انڈونیشیا کے مغربی جاوا صوبے میں دو مسافر ٹرینوں کے درمیان تصادم کے نتیجے میں چار افراد ہلاک اور42 زخمی ہو گئے ہیں۔

انڈونیشیا کے وزارت نقل و حمل کی ترجمان ادیتا ایراوتی نے بتایا کہ یہ حادثہ جمعہ کے روز اس وقت پیش آیا جب ملک کے دوسرے سب سے بڑے شہر سورابایا سے ایک طویل فاصلے کی ٹرین صوبائی دارالحکومت بانڈونگ کے قریب مسافر ٹرین سے ٹکرا گئی۔

انھوں نے کہا کہ امدادی کارکنوں نے حادثے کے بعد ملبے کو ہٹانے اور سروس کی بحالی کے لیے کام شروع کیا۔

مغربی جاوا پولیس کے ترجمان ابراہیم ٹومپو نے بتایا کہ ٹرینوں میں کل 478 مسافر سوار تھے۔

ابراہیم ٹومپو نے بتایا کہ ہلاک ہونے والوں میں ٹرین کا عملہ اور اس کا معاون اور ایکسپریس ٹرین کا ایک اسٹیورڈ اور ایک سیکیورٹی گارڈ شامل ہیں۔

حادثے کی وجہ فوری طور پر واضح نہیں ہوسکی تاہم ٹرین آپریٹر پی ٹی کے اے آئی اور صوبائی حکومت نے کہا ہے کہ وہ ٹرانسپورٹ سیفٹی حکام کے ساتھ مل کر تحقیقات کریں گے۔