پاکستان پیپلز پارٹی کے رہنما سعید غنی کا جی ڈی اے رہنما فہمیدہ مرزا کے کاغذات نامزدگی مسترد کیے جانے پر کہنا ہے کہ آراو کاغذات تصدیق کیلئے مختلف اداروں کو بھجواتے ہیں۔

سعید غنی نے کراچی میں پریس کانفرنس کرتے ہوئے کہا کہ فہمیدہ مرزا نے کاغذات نامزدگی میں اپنے اثاثے ڈکلیئر نہیں کئے، جب کوئی امیدوار کوئی چیز چھپاتا ہے تو اس بنیاد پر بھی پیپرز مسترد ہوجاتے ہیں۔

سعید غنی نے کہا کہ اس پر سپریم کورٹ کا 2018 میں بھی ایک فیصلہ آیا تھا۔

انہوں نے کہا کہ فہمیدہ مرزا اور ذوالفقار مرزا دونوں کے کاغذات مسترد ہوئے ہیں، فہمیدہ مرزا کے کاغذات میں کہیں بھی لائبلٹی کا ذکر نہیں۔

سعید غنی نے کہا کہ آئین کہتا ہے اگر کسی نے ڈیفالٹ کیا یا قرضہ معاف کرایا ہے تو الیکشن نہیں لڑسکتا، اسٹیٹ بینک نے چھٹی کے دن ان کی سہولتکاری کی۔

سعید غنی نے کہا کہ فہمیدہ مرزا نے کاغذات میں حقائق چھپائے ہیں، انہوں نے کاغذات میں کہیں بھی اپنے قرضوں کا ذکر نہیں کیا۔

ان کا کہنا تھا کہ اسٹیٹ بینک کا کردار اس معاملے میں قابل مذمت ہے، اسٹیٹ بینک کوشش کررہا ہے کہ بینک اور مرزا فیملی کےدرمیان سیٹلمنٹ ہو۔