لاہور کی سیشن کورٹ نے پی ٹی آئی سوشل میڈیا ایکٹوسٹ صنم جاوید کے جسمانی ریمانڈ میں ایک دن کی توسیع کردی۔

پولیس نے ایک روزہ جسمانی ریمانڈ مکمل ہونے بعد صنم جاوید کو ڈیوٹی ایڈیشنل سیشن جج اظہر احمد کی عدالت میں پیش کیا۔

تفتیشی افسر نے عدالت کو بتایا کہ مسلم لیگ ن کے آفس کو جلانے کے مقدمے میں مزید تفتیش درکار ہے، عدالت ملزمہ کا جسمانی ریمانڈ فراہم کرے۔ اس موقع پر صنم جاوید کے وکیل نے ریمانڈ کی مخالفت کی۔

عدالت نے فریقین کے دلائل سننے کے بعد ملزمہ کے جسمانی ریمانڈ میں ایک دن کی توسیع کردی اور منگل کو انسدادِ دہشت گردی عدالت میں پیش کرنے کی ہدایت کی۔

یاد رہے کہ صنم جاوید نے لاہور میں قومی اسمبلی کے حلقے این اے 119 سے پاکستان مسلم لیگ (ن) کی چیف آرگنائزر مریم نواز کے مقابلے میں کاغذات نامزدگی جمع کرائے تھے جو مسترد کردیے گئے۔

صنم جاوید کے عدالت میں پیشی کے موقع پر سردی سے بچنے کیلئے ایک ہوڈی (hoodie) پہن رکھی تھی۔ اس پر سامنے کی جانب لکھی ایک تحریر کی وجہ سے صنم جاوید کا لباس سوشل میڈیا پر موضوع بحث بن گیا ہے۔

ہوڈی پر موجود انگریزی تحریر کا مطلب تھا ’جب ناانصافی قانون بن جائے تو بغاوت فرض بن جاتی ہے۔‘

پیشی کے موقع پر صنم جاوید کی مسکراہٹ کے چرچے بھی پی ٹی آئی سوشل میڈیا حلقوں میں عام رہے۔