ایف آئی اے نے جعلی شناختی کارڈ بنانے میں ملوث 4 رکنی گینگ گرفتار کرلیا، ملزمان نادرا کے سابقہ افسران ہیں، جنہوں نے 2019 اور 20 میں غیرملکیوں کو شناختی کارڈ جاری کئے۔

شناختی کارڈز کے غیر قانونی اجراء کیس میں بڑی پیشرفت سامنے آئی ہے، اور ایف آئی اے اینٹی کرپشن سرکل اسلام آباد نے بڑی کارروائی کرتے ہوئے جعلی شناختی کارڈ بنانے میں ملوث 4 رکنی گینگ گرفتار کرلیا ہے۔

ترجمان ایف آئی اے کے مطابق گرفتار ملزمان نادرا کے سابقہ افسران ہیں، جنہیں اسلام آباد سے گرفتار کیا گیا ہے۔

ترجمان ایف آئی اے نے بتایا کہ گرفتار ملزمان میں محمد طاہر،عدنان عمار، محمد عامر خان اور محمد طیب شامل ہے، جو نادرا میگا سینٹر اسلام آباد میں بطور ڈپٹی اسسٹنٹ ڈائریکٹر اور سنئیر ایگزیکٹیو تعینات رہے، اور دوران تعیناتی سال 2019 اور 2020 میں غیرملکیوں کو شناختی کارڈ جاری کئے۔

ترجمان کے مطابق ملزمان احساس پروگرام کے نام پر مزدور طبقے کا بائیو میٹرک لیتے، اور بعد میں فیملی ٹری میں افغان شہریوں کا اندراج کرتے تھے۔

ترجمان ایف آئی اے کے مطابق ملزمان سادہ لوح شہریوں کو رقوم کا لالچ دے کر اپنے جال میں پھنساتے تھے، اور ان کے فیملی ٹری کا غیر قانونی استعمال کرتے تھے، ملزمان نے متعدد مزدورں کی فیملی ٹری میں افغان شہریوں کا اندراج کیا۔

ترجمان کے مطابق گرفتار ملزمان نے دوران تعیناتی متعدد شناختی کارڈز جاری کئے، ملزمان نے شناختی کارڈ جاری کرنے کی آڑ میں بھاری رقوم وصول کیں۔