کاغذات نامزدگی جمع کرانے کا مرحلہ مکمل، اسکروٹنی کا عمل شروع

کل سے شروع ہونے والا اسکروٹنی کا عمل 31 دسمبر تک جاری رہے گا

ویب ڈیسک

اپ ڈیٹ 25 دسمبر 2023 11:59am

پاکستان

عام انتخابات کے لیے کاغذات نامزدگی جمع کرانے کا کل آخری روز تھا، آج 25 دسمبر سے کاغذات نامزدگی کی اسکروٹنی کا عمل شروع ہوگیا جو 31 دسمبر تک جاری رہے گا۔

ترجمان الیکشن کمیشن کے مطابق کاغذاتِ نامزدگی کی جانچ پڑتال کے لیے آن لائن سہولت مرکز الیکشن کمیشن میں قائم کردیا گیا، نادرا، نیب، ایف آئی اے، ایف بی آر سہولت مرکز کی معانت کر رہا ہے۔

ترجمان ای سی پی کا کہنا ہے کہ اسٹیٹ بینک بھی جانچ پڑتال کے لیے معاونت کر رہا، یہ سہولت مرکز 24 گھنٹے کام کر رہا ہے، موصول شدہ امیدواران کے کوائف ان اداروں کو بھجوائے جا رہے ہیں۔

الیکشن کمیشن ترجمان کا کہنا تھا کہ چاروں چیف سیکریٹریز اور چیئرمین سی ڈی اے کو بھی تحریری مطلع کیا ہے، پاور، پٹرولیم، ہاؤسنگ اینڈ ورکس کو بھی فہرستیں حاصل کرنے کا کہا ہے جب کہ یہ ادارے ریٹرننگ افسران سے امیدواران کی فہرستیں حاصل کریں گے۔

ترجمان نے مزید کہا کہ امیدواروں کی فہرست کااجراء 24 دسمبر2023 کو کیا جا چکا، نادہندہ امیدواران 25 تا 30 دسمبر تک متعلقہ ریٹرننگ آفیسرسے رجوع کریں، نادہندگان سے واجبات کی وصولی یقینی بنائی جائے، حکومت کےتمام وفاقی، صوبائی ادارے فوری ریٹرننگ افسران سے رابطہ کریں۔

کاغذات نامزدگی جمع کرانے کا وقت جیسے ہی ختم ہوا تمام الیکشن کمیشن دفاتر کے دروازے بند کردیے گئے۔

الیکشن کمیشن سندھ کے دروازے بند کرکے کہا گیا کہ ہال کے اندرموجود امیدواروں سے ہی اب کاغذات وصول کئےجائیں گے، جب کہ باہر سے کسی بھی امیدوار کو اب اندر جانے کی اجازت نہیں ملے گی۔

خیبرپختونخوا میں بھی کاغذات نامزدگی جمع کرانے کا وقت ختم ہوا تو دروازے بند کردیئے گئے اور بیان جاری ہوا کہ الیکشن کمیشن اور آروز کے آفس میں موجود امیدوار ہی کاغذات جمع کراسکتے ہیں۔ بیشتر سیاسی جماعتوں کے قائدین نے خیبرپختونخوا کے مختلف حلقوں پر کاغذات جمع کرائے۔

گزشتہ روز پاکستان مسلم لیگ (ن) کی مریم نواز نے این اے 120 لاہور سے کاغذات جمع کرائے، جبکہ ملتان سے شاہ محمود قریشی اور جاوید ہاشمی کے کاغذات نامزدگی جمع کرائے گئے۔

مسلم لیگ ضیاء کے سربراہ اعجازالحق نے بہاولنگر سے کاغذات جمع کرائے، عثمان ڈار کی والدہ ریحانہ امتیاز ڈار خواجہ آصف کے خلاف میدان میں اترگئیں اور اپنے کاغذات نامزدگی این اے 71 سے جمع کرا دیے۔

سابق وزیراعلیٰ خیبرپختونخوا محمود خان سوات سے الیکشن لڑیں گے۔

بانی پی ٹی آئی عمران خان، جمیعت علماء اسلام (ف) کے سربراہ مولانا فضل الرحمان اور جماعت اسلامی کے امیر سراج الحق بھی کاغذات جمع کراچکے ہیں۔

آئی پی پی کے پیٹرن ان چیف جہانگیر ترین نے ملتان سے بھی الیکشن لڑنے کا فیصلہ کرلیا وہ قومی اسمبلی کے حلقہ این اے 149 ملتان سے بھی متوقع امیدوار ہوسکتے ہیں، انہوں نے کاغذات نامزدگی حاصل کرلیے۔