صدر مملکت ڈاکٹر عارف علوی اور نگراں وزیراعظم انوار الحق کاکڑ کے درمیان ٹیلی فونک رابطہ ہوا، جس میں دونوں رہنماؤں نے بلوچ مظاہرین پر ہونے والے پولیس تشدد پر تشویش کا اظہار کیا۔

ٹیلی فونک گفتگو میں دونوں رہنماؤں نے بلوچ مظاہرین کے خلاف اسلام آباد پولیس کے رویے کو نامناسب قرار دیا اور کہا کہ پولیس کو مظاہرین کے خلاف سختی سے پیش نہیں آنا چاہیئے تھا۔

نگراں وزیر اعظم نے صدر مملکت کو آگاہ کیا کہ گرفتار مظاہرین کو ذاتی مچلکوں پر رہا کر رہے ہیں۔

صدر سے گورنر بلوچستان کی ملاقات، پولیس تشدد پر تبادلہ خیال

دوسری جانب صدرمملکت عارف علوی سے گورنر بلوچستان ملک عبدالولی کاکڑ نے بھی ملاقات کی، جس میں صوبے کی مجموعی صورتحال اور مظاہرین پر پولیس تشدد پر تبادلہ خیال کیا گیا۔

دونوں رہنماؤں کی ملاقات میں گفتگو کی گئی کہ پولیس کو اختیارات سے تجاوز نہیں کرنا چاہیئے تھا۔

ملک عبدالولی کاکڑ نے کہا کہ پولیس کو مظاہرین سے تحمل اور ہمدردی سے پیش آنا چاہیئے تھا اور اپنے حد و اختیار سے تجاوز نہیں کرنا چاہیے تھا۔

مزید پڑھیں

مارچ کے شرکاء نے پتھروں اور ڈنڈوں سے حملہ کیا، پولیس رپورٹ، 282 گرفتار

تربت واقعے اور احتجاج پر حکومت نے نوٹس لے لیا، تحقیقات کے لئے انکوائری ٹربیونل تشکیل

بالاچ مولابخش کے قتل کا مقدمہ پولیس افسر اور سی ٹی ڈی اہلکاروں کیخلاف درج، فیکٹ فائنڈنگ کمیٹی کا سربراہ تبدیل

گورنر بلوچستان نے مطالبہ کیا کہ پولیس احتجاج کرنے والوں کو فوری رہا کرے۔

ملاقات میں دونوں رہنماؤں نے بلوچستان میں امن و امان کی صورتحال بہتر بنانے پر بھی زور دیا۔