ہیوی الیکٹریکل کمپلیکس (ایچ ای سی) کی نجکاری کی ٹرانزیکشن رواں ماہ مکمل کرنے کا فیصلہ کرلیا گیا، وزیر نجکاری فواد حسن فواد نے خریدار نجی کمپنی کو تمام رسمی اور ضابطے کی کارروائی پوری کرنےکی ہدایت کر دی۔

نگراں وفاقی وزیر برائے نجکاری فواد حسن فواد کی زیر صدارت نجکاری ڈویژن میں ہیوی الیکٹریکل کمپلیکس کی نجکاری کے حوالے سے اجلاس ہوا، جس میں ایچ ای سی کی فروخت اور نجکاری پر پیش رفت کا جائزہ لیا گیا۔

اجلاس میں تمام اسٹیک ہولڈرز بشمول آئی ایم ایس انجینئرنگ، مالیاتی ایڈوائزر، وزارت صنعت اور بینک آف خیبر نے شرکت کی۔

اسٹیک ہولڈرز نے فروخت کے معاہدے کی تکمیل کے روڈ میپ پر تبادلہ خیال کیا اور اسے حتمی شکل دی۔

نگراں وفاقی وزیر نے خریدار، آئی ایم ایس انجینئرنگ کو ہدایت کی کہ وہ رواں ماہ کے آخر تک نجکاری کی تکمیل کے لیے تمام رسمی کارروائیاں اور کاغذی کارروائی مکمل کریں۔