پاکستان شوبزانڈسٹری کی دیوا ریشم نے شوبز کے شادی شدہ جوڑوں کے درمیان علیحدگیوں پر افسوس کا اظہار کیا ہے۔

سوشل میڈیا پر ایک ویڈیو وائرل ہورہی ہے جس میں ریشم کو شادی سے متعلق گفتگو کرتے ہوئے دیکھا جاسکتا ہے۔

یہ وائرل کلپ ریشم کا پوڈکاسٹ شو میں دیے گئے ایک انٹرویو کا ہے جس میں انہوں نے اپنی نجی زندگی اور شوبز انڈسٹری سے متعلق گفتگو کی ہے۔

میزبان نے جب ریشم سے شادی سے متعلق سوال کیا تو انہوں نے کہا کہ ’شوبز انڈسٹری میں شادیاں ہو تو رہی ہیں، لیکن شادیاں ہونے کے بعد ٹوٹ رہی ہیں۔ اتنی شادیاں ٹوٹی ہیں اور مجھے بہت دکھ بھی ہوا کہ نہیں ٹوٹنی چاہئے‘۔

انہوں نے شوبز کے کسی اداکار سے شادی نہ کرنے کی وجہ پر روشنی ڈالتے ہوئے کہا کہ ’شوبز میں سال یا ڈیڑھ سال سے زیادہ شادیاں چلتی ہی نہیں ہیں۔ شوبز میں 7 یا 8 شادیاں ٹوٹ چکی ہیں اور مجھے ان شادیوں کے ٹوٹنے پر بہت دکھ بھی ہوا ہے‘۔

ریشم نے سجل علی کی احد رضا اور عمران اشرف کی کرن اشفاق سے علیحدگی پر گفتگو کرتے ہوئے کہا کہ ’سجل کی شادی ٹوٹی مجھے بہت دکھ ہوا کیونکہ سجل مجھے بہت پسند ہے، میرا اس کے ساتھ کام کرنے کا بہت اچھا تجربہ رہا ہے۔ عمران اشرف کی شادی نہیں ٹوٹنی چاہئے تھی، دونوں میاں بیوی سے میں ملی ہوں۔ دونوں میں بہت محبت تھی، دونوں بہت اچھے تھے‘۔

اپنی شادی سے متعلق انہوں نے کہا کہ ’جب مجھے کوئی مل جائے گا تو مستقبل میں میرا بھی ارادہ ہے شادی کا‘۔

انہوں نے مزید کہا کہ ’محبت میں بنھانا بہت ضروری ہے۔ اللہ کے نزدیک میاں بیوی کا رشتہ سب سے زیادہ پسندیدہ ہے، اور یہ رشتہ اب نہ صرف کمزور ہورہا ہے بلکہ تیزی سے ٹوٹ بھی رہا ہے‘

ریشم کا شمار پاکستان کی مقبول اداکاراؤں میں ہوتا ہے، انہوں نے فلمی دنیا پر کئی عرصے تک راج کیا ہے۔

انہوں نے اپنے کیریئر میں کئی ہٹ فلموں میں اداکاری کی ہے، ان کو آج بھی ان کے مداح خوب پسند کرتے ہیں۔