نگران وزیر اعلیٰ پنجاب محسن نقوی نے لاہور سفاری پارک کا دورہ کیا۔ اور سفاری زو کو سنگاپور طرز کا زو بنانے کا اعلان کیا۔ بہاولپور چڑیا گھر میں پیش آنے والے واقعے کو وزیراعلیٰ نے نوجوان کی غفلت قرار دیا۔

وزیراعلی پنجاب محسن نقوی نے رائیونڈ سفاری پارک کے اپ گریڈیشن منصوبے کا سنگ بنیاد رکھ دیا۔ اس موقع پر میڈیا سے گفتگو کرتے ہوئے محسن نقوی نے کہا کہ 244 ایکڑ رقبے پر محیط سفاری زو پارک کو سنگاپور کے سفاری پارک کی طرز پر اپ گریڈ کیا جائے گا۔

انھوں نے کہا کہ سفاری پارک میں نئے جانور بھی لائے جائیں گے، ہم نے چائنہ سے پانڈہ دینے کی درخواست بھی کی ہے۔

بہاولپور واقعہ پر وزیراعلیٰ نے کہا کہ ممنوعہ علاقہ ہونے کے باوجود وہ نوجوان اندر گیا، بظاہر تو یہی لگ رہا وہ ویڈیوز بنانے کے شوق سے گیا تھا۔

اس سے قبل وزیراعلیٰ محسن نقوی نے گوجرانوالہ کو لاہور سیالکوٹ موٹروے کے ساتھ لنک کرنے کیلئے زیر تعمیر سڑک پر پیشرفت کا جائزہ لیا۔

اس موقع پر انھوں نے کہا کہ گوجرانوالہ ایکسپریس وے جدید سفری سہولیات کے ساتھ ایک اہم سنگ میل ثابت ہو گا، منصوبے کی تکمیل سے لاہور سے گوجرانوالہ کا فاصلہ صرف 45 منٹ میں طے کیا جا سکے گا۔