بالی ووڈ کی معروف اداکارہ پریانکا چوپڑا بھی مصنوعی ذہانت کی ستم کاریوں کا نشانہ بن گئیں، دیگر اداکاراؤں کے بعد پریانکا کی جعلی ویڈیو بھی سوشل میڈیا پر وائرل ہے۔

سوشل میڈیا پروائرل ویڈیو میں پریانکا چوپڑا کو ایک برانڈ کی تشہیر کرتے ہوئے دیکھا جاسکتا ہے۔

بالی ووڈ اداکارہ کی یہ ویڈیو مصنوعی ذہانت کا استعمال کرتے ہوئے بنائی گئی ہے۔

دیگر اداکاراؤں کے برعکس پریانکا چوپڑا کا چہرہ متنازع ویڈیوز پرایڈٹ نہیں کیا گیا۔ تاہم اصل ویڈیو سے ان کی آواز اور جملوں کو جعلی برانڈ پروموشن سے بدل دیا گیا ہے۔

وائرل ویڈیو میں پرینکا چوپڑا اپنی سالانہ کمائی سے متعلق گفتگو کرنے کے ساتھ ساتھ ایک برانڈ کی تشہیر کرتی نظر آرہی ہیں۔

کچھ دن قبل اداکارہ کاجول کی ایک ایڈیٹڈ ویڈیو بھی آن لائن سامنے آئی تھی۔ اصل کلپ میں انفلوئنسر روزی برین تھیں جنہوں نے ’گیٹ ریڈی ود می‘ ٹرینڈ کے حصے کے طور پر ٹک ٹاک پر کلپ شیئر کیا تھا۔ ڈیپ فیک میں برین کے چہرے کی جگہ کاجول کا چہرہ دکھایا گیا تھا۔

اس جعلی کلپ میں ’کچھ کچھ ہوتا ہے‘ کی اداکارہ کو کیمرے کے سامنے کپڑے بدلتے دکھایا گیا۔

رشمیکا مندانا کا ایک کلپ سب سے پہلے وائرل ہونے کے بعد ڈیپ فیک کے بارے میں تشویش بڑھتی جارہی ہے۔

پریانکا چوپڑا سے قبل رشمیکا مندانا، کترینہ کیف، کاجول اور عالیہ بھٹ کی ڈیپ فیک تصاویر اور ویڈیوز سوشل میڈیا پر وائرل ہورہی تھیں۔

ڈیپ فیک کیا ہے ؟

ڈیپ فیک ایک ایسی ٹیکنالوجی ہے جس کے ذریعے کسی ایک شخص کے چہرے پر کسی دوسرے شخص کا چہرہ اور آواز لگا دی جاتی ہے جسے دیکھنے والے کو لگتا ہے کہ وہ ایک ایسے شخص کی ویڈیو دیکھ رہا ہے جو دراصل اس کی ہے ہی نہیں۔