ڈسٹرکٹ اینڈ سیشن کورٹ نے تھانہ کوہسارمقدمے میں شیخ رشید کی ضمانت کی توثیق کردی، سابق وفاقی وزیرکا کہنا ہے کہ 20 دسمبر کو پتہ چلے گا مجھ پر کتنے مقدمات ہیں۔

اسلام آباد کی ڈسٹرکٹ اینڈسیشن کورٹ میں عوامی مسلم لیگ کے سربراہ شیخ رشید کی درخواست ضمانت پرسماعت ایڈیشنل ڈسٹرکٹ اینڈ سیشن جج طاہرعباس سپرا نے کی۔

شیخ رشید اپنے وکلا کے ہمراہ عدالت میں پیش ہوئے، عدالت نےتھانہ کوہسار مقدمہ میں ضمانت کی توثیق کردی۔

ڈسٹرکٹ کورٹ کے باہرمیڈیا سے بات کرتے ہوئے شیخ رشید احمد کا کہنا تھا کہ عدالت سے یہاں بھی ضمانت کنفرم ہوگئی ہے، 20 تاریخ کو لاہور ہائیکورٹ میں پتا چلے گا مجھ پر کل کتنے کیسز ہیں، تاہم کیسز جھوٹ پر مبنی ہیں۔

شیخ رشید نے کہا کہ 10 دسمبر سے الیکشن مہم شروع کر رہے ہیں، چیف جسٹس نے کہا ہے کہ الیکشن ہوں گے تو میری کیا اوقات کہ کچھ کہوں۔

انہوں نے کہا کہ اصل مسئلہ معاشی ہے، لوگوں کے حالات بس سے باہر ہوگئے ہیں۔