نگراں وزیراطلاعات بلوچستان جان اچکزئی نے کہا کہ افغانستان میں دہشت گردوں کو پناہ مل رہی ہے جس پر پوری دنیا کو تشویش ہے، جب کہ ملک کے خلاف پروپیگنڈا کرنے والوں کو انٹرپول کے ذریعے واپس لائیں گے۔

کوئٹہ میں نیوز کانفرنس کرتے ہوئے نگراں وزیراطلاعات بلوچستان جان اچکزئی کا کہنا تھا کہ انسانی زندگیوں سے کھیلنے والوں کا حساب ہوگا، ملک کے خلاف پروپیگنڈا کرنے والوں کو واپس ملک لائیں گے، ان لوگوں نے اپنی دھرتی ماں سےغداری کی ہے، ان سے حساب لیا جائے گا۔

جان اچکزئی نے کہا ہے کہ افغانستان میں دہشت گردوں کو پناہ مل رہی ہے، افغانستان میں دہشت گردوں کی موجودگی پر پوری دنیا کو تشویش ہے۔

نگراں وزیر نے کہا کہ غیر قانونی طورپرمقیم غیرملکیوں کو واپس بھیجا جا رہا ہے اور بغیر کاغذات کسی کو بھی ملک میں داخل نہیں ہونے دیں گے، نادرا نے بلوچستان میں جعلی شناختی کارڈز بلاک کر دیئے ہیں، ایک اندازے کے مطابق بلوچستان میں ڈھائی لاکھ جعلی شناختی کارڈز ہیں۔