بھارتی ریاست کیرالہ کی کوچین یونیورسٹی آف سائنس اینڈ ٹیکنالوجی میں میوزک کنسرٹ کے دوران بھگدڑ مچنے سے چار طلبا ہلاک اور 64 زخمی ہوگئے۔

میڈیا رپورٹ کے مطابق ہلاک ہونے والے چار طالب علموں میں دو لڑکے اور دو لڑکیاں شامل ہیں، ان میں سے تین انجینئرنگ کے دوسرے سال کے طالب علم تھے۔

کیرالہ کے وزیر اعلی پنارائی وجین نے کوچی یونیورسٹی میں چار طلبا کی ہلاکت پر تعزیت کا اظہار کرتے ہوئے دیگر وزرا کے ساتھ ہنگامی اجلاس طلب کرلیا۔

افسوسناک واقعے پر ریاست کے گورنرعارف محمد خان نے کہا کہ انہیں چار طلبا کی افسوسناک موت کے بارے میں سُن کر دکھ ہوا ہے۔

سینئر پولیس اہلکار نے بتایا کہ ابتدائی اطلاعات کے مطابق اچانک بارش کی ہونے کی وجہ سے کنارے پر کھڑے طلبا بارش سے بچنے کے لیے دوسرے مقام پر جانے کے لیے بڑھے، تو بھگدڑ مچ گئی، سیڑھیوں پر کھڑے لوگ نیچے گر گئے۔

وائس چانسلر، ڈاکٹر سنکرن نے خبر رساں ایجنسی اے این آئی کو بتایا کہ میوزیکل کنسرٹ کے موقع پر بدقسمتی سے بھیڑ بہت زیادہ تھی اور بارش بھی تھی، جس وجہ حادثہ پیش آیا۔

ان کا کہنا تھا کہ زخمیوں کی تعداد کے بارے میں علم نہیں لیکن کنسرٹ میں دو ہزار سے زائد طلبا موجود تھے، دو کی کی حالت نازک ہے۔