شمالی وزیرستان میں شہید ہونے والے سپاہی شاہ زیب کی نماز جنازہ ادا کردی گئی جس کے بعد شہید کو پورے فوجی اعزاز کے ساتھ سپرد خاک کردیا گیا۔

ترجمان پاک فوج کے مطابق شمالی وزیرستان کے علاقے غریوم میں دیسی ساختہ بم پھٹنے کے نتیجے میں شہید ہونے والے سپاہی شاہ زیب کی نماز جنازہ ادا کردی گئی، 26 سالہ سپاہی شاہ زیب کی نمازجنازہ راولپنڈی میں ان کے آبائی قصبہ گوجر خان میں ادا کی گئی۔

نمازجنازہ کی ادائیگی کے بعد شہید کو پورے فوجی اعزاز کے ساتھ سپرد خاک کر دیا گیا۔

نمازجنازہ میں سینئر حاضر سروس فوجی افسران، عزیز و اقارب اور اہل علاقہ نے شرکت کی۔

ترجمان کے مطابق مسلح افواج مادر وطن سے دہشت گردی کی لعنت کو ہر قیمت پر ختم کرنے کے لئے پرعزم ہیں۔