بالی ووڈ اداکار کرینہ کپور اور سیف علی خان کی شادی کو 11 سال سے زیادہ ہو چکے ہیں۔ لیکن اب جا کر انہوں نے ایسا انکشاف کیا ہے کہ لوگ حیران رہ گئے ہیں۔

میگزین کو دیے گئے ایک حالیہ انٹرویو میں کرینہ نے بتایا کہ انہوں نے پانچ سال بنا شادی کے ”لیو ان ریلیشن شپ“ میں سیف علی خان کے ساتھ گزارے۔

کرینہ کا کہنا تھا کہ جب دونوں کو بچوں کی خواہش ہوئی تو شادی کرنا پڑی۔

خیال رہے کہ جب سیف کی کرینہ کپور سے ملاقات ہوئی تو وہ پہلے سے ہی دو بچوں کے باپ تھے۔ ان کی امریتا سنگھ سے 2004 میں طلاق ہو چکی تھا۔

دوسری جانب کرینہ کپور نے شاہد کپور کو چھوڑ کر 10 سال بڑے سیف علی خان کا ہاتھ تھاما تھا۔

کرینہ نے کہا کہ وہ اپنے بچوں تیمور علی خان اور جہانگیر علی خان کی موجودگی میں بغیر کسی دباؤ کے اپنی زندگی گزارنا چاہتی ہیں۔

کرینہ کا کہنا تھا کہ ’شادی کرنے کی وجہ یہ ہے کہ آپ بچے چاہتے ہیں، صحیح کہہ رہی ہوں، میرا مطلب ہے کہ اگر ایسا نہیں ہے تو آپ صرف ساتھ رہتے ہیں۔ سیف اور میں پانچ سال تک ساتھ رہے تھے، تو ہم اس لئے آگے بڑھے کیونکہ ہم بچے چاہتے تھے۔‘

بچوں کی پرورش کے حوالے سے کرینہ کی رائے بہت آسان ہے۔ وہ کہتی ہیں کہ اس میں کچھ صحیح یا غلط نہیں ہے۔ ہم بچوں کی شخصیت کو قبول کرتے ہیں اور اسی طرح سلوک کرتے ہیں۔ ہم ان کا احترام کرتے ہیں اور انہیں وہ بننے دیتے ہیں جو وہ ہیں۔ وہ اپنا راستہ خود تلاش کریں گے۔