پاکستان کرکٹ ٹیم کے سابق آل راؤنڈر عبدالرزاق کے بالی ووڈ اداکارہ ایشوریا رائے سے متعلق حالیہ ریمارکس نے سوشل میڈیا پر دھوم مچادی ہے۔

انہوں نے ورلڈ کپ 2023 میں قومی کرکٹ ٹیم کی کارکردگی کا تجزیہ کرتے ہوئے پی سی بی پر تنقید کیلئے عجیب وغریب تشبیہہ دی تھی۔

تاہم اس دوران پاکستان کے سابق کپتان شاہد آفریدی بھی موجود تھے، عبدالرزاق کے ان ریمارکس پر ان کی تالیوں نے صارفین کو بھی تعیش میں مبتلا کردیا تھا۔

جس کے بعد پاکستان کرکٹ ٹیم کے سابق فاسٹ بولر شعیب اختر نے سماجی رابطے کی ویب سائٹ ایکس پر عبدالرزاق کے بیان پر ناپسندیدگی کا اظہار کرتے ہوئے شاہد آفریدی کا دفاع کیا ہے۔

ایکس پر پوسٹ میں انہوں نے انکشاف کیا کہ اس واقعے کے حوالے سے ان کی شاہد آفریدی سے بات ہوئی ہے۔ ان کے مطابق شاہد آفریدی واقعی نہیں سمجھے تھے کہ کیا کہا گیا تھا ورنہ وہ وہاں اس کی مذمت کرتے۔

شاہد آفریدی کی جانب سے شعیب اختر کے ذریعے دی گئی اس وضاحت سے ظاہر ہوتا ہے کہ آفریدی کو اس وقت رزاق کے تبصرے کی نوعیت کا اندازہ نہیں تھا۔

عبدالرزاق کے اس متنازع بیان سے سوشل میڈیا صارفین نے ان کو شدید تنقید کا نشانہ بھی بنایا تھا۔

شدید تنقید کے بعد عبدالرزاق نے ویڈیو بیان جاری کرتے ہوئے اپنے ان ریمارکس پر معافی مانگ لی۔