ترقی، ٹیکنالوجی اورجدت کے اس دور میں موبائل فونز دنیا بھر کے انسانوں کی ضرروت بن چکے ہیں، اب جبکہ موبائل فونز کمپیوٹرز کی جگہ لے رہے ہیں تو ایسے میں ایک پاکستانی کی قائم کردہ کپمنی کی بدولت موبائل فونز بھی ناپید ہو جانے کا خدشہ پیدا ہوگیا ہے۔

”ہیومن“ نامی کمپنی نے مصنوعی ذہانت پر مبنی ایک ایسی ڈیوائس لانچ کردی ہے جو موبائل فونز کو لے کر گھومنے کی ضرورت مکمل طور پر ختم کردے گی۔ یہ کمپنی عمران چوہدری اور ان کی اہلیہ کی ملکیت ہے جو اس سے قبل ایپل کے لیے کام کرتے تھے۔

ہیومن نے اس ڈیوائس کو ”اے آئی پِن“ (AI Pin) کا نام دیا ہے، جو شرٹ کے کالر میں لگائی جاسکتی اور آپ کی ہتھیلی پر تمام فنکشنز کو پروجیکٹ کرکے دکھاتی ہے۔

بنیادی طور پر ہیومین نے ایک وئیرایبل اے آئی اسسٹنٹ بنایا ہے جو آپ کے اسمارٹ فونز والے سارے کام کرے گا۔

عمران چوہدری اور ان کی بیوی بیتھنی دونوں ایپل کے سابقہ ملازم ہیں، عمران چوہدری ایپل کے ڈیزائنر تھے، انہوں نے 20 سال ایپل میں کام کیا، بہت سے آئی پیڈز، آئی فونزز اور اسیسریز کو ڈیزائن کیا، آئی فون کا انٹرفیس بھی عمران چوہدری نے ڈیزائن کیا۔

بیتھنی ایپل کی سافٹ وئیر ڈائریکٹر تھیں، آئی او ایس کے تمام پراجیکٹس کی ذمہ داری بیتھنی کی تھی۔

ان دونوں نے پانچ سال پہلے اپنی کمپنی ہیومین بنائی۔

اور اب ہیومن نے جمعرات کو مہینوں کے ڈیمو اور اشاروں کے بعد اپنی اس ڈیوائس اے آئی پن کا بالآخر لانچ کردیا ہے۔

یہ ڈیوائس صرف کپڑوں پر ہی نہیں بلکہ مقناطیسی طور پر کسی بھی سطح سے منسلک کی جاسکتی ہے اور یہ دو حصوں پر مشتمل ہے، ایک مربع ڈیوائس اور ایک بیٹری پیک۔

اس ڈیوائس کو فی الحال 699 ڈالرز کی قیمت میں فروخت کیلئے پیش کیا گیا ہے، اس قیمت کے علاوہ، ہیومن سبسکرپشن کے لیے 24 ڈالرز ماہانہ فیس بھی ہے، جو آپ کو T-Mobile کے نیٹ ورک کے ذریعے فون نمبر اور ڈیٹا کوریج فراہم کرتی ہے۔

کمپنی کا کہنا نہے کہ ڈیوائس کی ترسیل 2024 کے اوائل میں شروع ہو جائے گی اور اس کے پیشگی آرڈرز 16 نومبر سے شروع ہوں گے۔

اے آئی پن اسنیپ ڈریگن پروسیسر سے چلتی ہے، لیکن یہ واضح نہیں کیا گیا کہ کونسا ورژن۔ آپ اسے وائس کنٹرول، کیمرہ، اشاروں اور ایک چھوٹے بلٹ ان پروجیکٹر کے امتزاج سے کنٹرول کرتے ہیں۔

پن کا وزن تقریباً 34 گرام ہے، اور ”بیٹری بوسٹر“ وزن میں مزید 20 کا اضافہ کرتا ہے۔

اس کا بلٹ ان کیمرہ 13 میگا پکسل کی تصاویر لیتا ہے اور سافٹ ویئر اپ ڈیٹ کے بعد ویڈیو بھی بنا پائے گا۔

کمپنی کا دعویٰ ہے کہ اس ڈیوائس کا مقصد ہمیشہ ریکارڈنگ کرنا نہیں ہے، اور یہ خود بخود آن بھی نہیں ہوتا، جیسا کہ ایلیکسا اور سیری کرتے ہیں۔ یہ ڈیوائس آپ کو مسلسل سنتی بھی نہیں۔

آپ کو ٹچ پیڈ پر ٹیپ کرکے اور انگلی سے سلائیڈ کر مینوئلی ڈیوائس کو آن کرنا پڑے گا، پن کی ”ٹرسٹ لائٹ“ آپ کو اور قیاس کے مطابق ہر کسی کو یہ بتانے کے لیے جل بجھ ہوتی ہے کہ یہ ڈیٹا اکٹھا کر رہی ہے۔

پن کا بنیادی کام سافٹ ویئر کے ذریعے اے آئی ماڈلز سے جڑنا ہے جسے کمپنی اے آئی مائیک (AI Mic) کہتی ہے۔

ہیومن کی پریس ریلیز میں مائیکروسافٹ اور اوپن اے آئی دونوں کا تذکرہ کیا گیا ہے، اور پچھلی رپورٹس میں بتایا گیا ہے کہ پن بنیادی طور پر GPT-4 سے چلتی ہے۔

ہیومن کا کہنا ہے کہ چیٹ جی پی ٹی تک رسائی دراصل ڈیوائس کی بنیادی خصوصیات میں سے ایک ہے۔ اس کا آپریٹنگ سسٹم، جسے Cosmos کہا جاتا ہے، آپ کے سوالات کو خود بخود صحیح ٹولز تک پہنچانے کے لیے ڈیزائن کیا گیا ہے بجائے اس کے کہ آپ ایپس کو ڈاؤن لوڈ اور ان کی سیٹنگز کریں۔

ہیومن نے بنیادی طور پر اے آئی پن سے تمام انٹرفیس کرافٹ کو ہٹا دیا ہے۔ اس میں ہوم اسکرین یا انتظام کرنے کے لیے بہت سی ترتیبات اور اکاؤنٹس نہیں ہوں گے۔

خیال یہ ہے کہ آپ صرف پن سے بات کر سکتے ہیں یا چھو سکتے ہیں، اسے کہہ سکتے ہیں کہ آپ کیا کرنا چاہتے ہیں یا جاننا چاہتے ہیں، اور یہ خود بخود ہو جائے گا۔

اب سوال یہ ہے کہ یہ چیز اصل میں کیا کر سکتی ہے۔

ہیومن نے اپنے اعلان میں جن خصوصیات کا تذکرہ کیا ہے ان میں سے زیادہ تر وہ خصوصیات ہیں جو اس سال کے شروع میں ٹی ای ڈی کے ایک ڈیمو کے دوران شریک بانی عمران چوہدری نے دکھائی تھیں۔

ان میں آواز پر مبنی پیغام رسانی اور کالنگ، ایک ”کیچ می اپ“ خصوصیت جو آپ کے ای میل ان باکس کا خلاصہ کر سکتی ہے۔

غذائیت سے متعلق معلومات حاصل کرنے کے لیے کھانے کو کیمرے کے سامنے رکھنا اور رئیل ٹائم ٹرانسلیشن شامل ہیں۔

کمپنی نے بتایا کہ وہ نیویگیشن اور خریداری کی صلاحیتوں کو شامل کرنے کا ارادہ رکھتی ہے، اور ڈویلپرز کو اپنے ٹولز بنانے کے طریقے فراہم کرنے کا ارادہ رکھتی ہے۔

ایسا لگتا ہے کہ ہیومن اے آئی پن کو ایک بڑے پروجیکٹ کے آغاز کے طور پر دیکھ رہی ہے، جو شاید درست ہے۔

یہ ڈیوائس مزید بہتر ہوتی جائے گی کیونکہ بنیادی ماڈلز بہتر ہوتے جائیں گے، اور بظاہر پوری ٹیک انڈسٹری اے آئی کے ساتھ نئی چیزوں کی تلاش میں سخت محنت کر رہی ہے۔

ہیومن کو امید ہے کہ اس کی ڈیوائس اسی طرح کارآمد ہوگی جس طرح اسمارٹ فونز ہیں۔ یعنی بہتر ہارڈ ویئر وقت کے ساتھ ساتھ صارف کے تجربے کو بہتر بنائے گا۔

لیکن اصل انقلاب اس سے آتا ہے جو آپ ڈیوائس کے ساتھ کر سکتے ہیں۔ اس محاذ پر بہت سا کام کرنا باقی ہے، لیکن ہیومن بظاہر شروعات کرنے کے لیے تیار ہے۔