اسلام آباد کو دنیا کا دوسرا سب سے خوبصورت دارالحکومت کہا جاتا ہے لیکن کیپیٹل ڈویلپمنٹ اتھارٹی کی عدم توجہی سے اب یہاں بھی پاکستان کے سب سے بڑے شہرجیسے مناظرعام ہورہے ہیں۔

کراچی کی طرح اسلام آباد کی اسٹریٹ لائٹس بند اور4 گٹروں کے ڈھکن غائب نظر آتے ہیں۔

سوشل میڈیا پرگزشتہ روز ایک تصویر خاصی وائرل ہوئی جس میں بیچ سڑک ایک کھلے گٹرپرڈھکن کے بجائے کموڈ رکھ دیا گیا ہے۔

سیکٹر آئی نائن کے انڈسٹریل ایریا کی ایک سڑک پر کموڈ رکھنے کی نفاست بتاتی ہے کہ اسے بڑے طریقے سے یہاں فکس کیا گیا ہے کہ تا کہ یہ ڈھکن کا متبادل بن سکے۔

صارفین نے یہ تصویر دیکھتے ہی دلچسپ تبصروں سے اپنے خیالات کا اظہار کیا۔

کموڈ سے گٹر کو کور کرنے پر ایک صارف نے طنزیہ لکھا، ’دنیا کا دوسرا سب سے خوبصورت دارالحکومت‘۔

ایک صارف نے کموڈ کے اس انوکھے استعمال پر لکھا، ’ہم بھرپور ترقی کی طرف جاتے ہوئے‘۔

ایک صارف نے طنزیہ لکھا انتظامیہ نے بالآخر پبلک ٹوائلٹ نصب کردیے ہیں۔

فیضان خٹک لکھتے ہیں کہ شہر کی انتظامیہ نے بالآخرعوام کی بات سنتے ہوئے پبلک ٹوائلٹ نصب کر دیے۔

تاہم اچھی بات یہ رہی کہ سوشل میڈیا پرصارفین کی جانب سے نشاندہی کے بعد سی ڈی اے نے فوری کارروائی کرتے ہوئے گٹر کا ڈھکن لگا دیا۔

کیپیٹل ڈویلپمنٹ اتھارٹی نے مسئلہ اُجاگر کرنے والے ’اسلام آبادیز‘ ہینڈل کا شکریہ ادا کرتے ہوئے بتایا کہ مسئلہ حل کرتے ہوئے گٹر کا ڈھکن لگا دیا گیا ہے۔