میانوالی ائیر بیس حملے میں غیر ملکی اسلحہ استعمال ہوا جس میں RPG-7، AK-74، M-4 اور M-16/A4 شامل ہیں۔

گزشتہ روز میانوالی ائیر بیس حملے سے متعلق سنسنی خیز انکشافات منظر عام پر آئے ہیں، اور حملے میں غیر ملکی اسلحہ استعمال ہونے کا بڑا انکشاف ہوا ہے۔

رپورٹ میں انکشاف ہوا ہے کہ حملے میں مارے جانے والے دہشتگردوں سے غیر ملکی اسلحہ برآمد ہوا جو امریکی ساخت کا ہے، اس اسلحے میں RPG-7، AK-74، M-4 اور M-16/A4 شامل ہیں۔

دوسری جانب ماہرین کا کہنا ہے کہ امریکی ساختہ ہتھیار افغانستان میں وافر مقدار میں موجود ہیں، اور افغان سرزمین پر کھلے عام فروخت ہو رہے ہیں اور دہشت گردوں تک ان کی رسائی انتہائی آسان ہے۔

ماہرین کا کہنا ہے کہ پاکستان کے خلاف غیر ملکی سرزمین کا استعمال اور امریکا کے افغانستان سے اِنحلا کے بعد دہشت گرد آزادانہ غیر مُلکی ہتھیاروں کا استعمال کرتے آرہے ہیں۔

دفاعی ماہرین نے کہا ہے کہ اس سے پہلے بھی ژوب کنٹونمنٹ حملے میں بھی امریکی ہتھیاروں اور سازو سامان کا استعمال ہوا تھا، افغان انٹرم گورنمنٹ کو اپنی سرزمین کو دہشت گردوں کے استعمال سے روکنا ہوگا۔

واضح رہے کہ 4 نومبر کو ہفتے کے روز پاکستان ائرفورس ٹریننگ بیس میانوالی پردہشت گردوں کی جانب سے حملے کی کوشش کو ناکام بنادیا گیا تھا۔

آئی ایس پی آر کے مطابق حملے کے وقت سکیورٹی اہلکاروں نے غیر معمولی جرات اور بروقت جوابی کارروائی کا مظاہرہ کرتے ہوئے 3 دہشت گردوں کو بیس میں داخل ہونے سے پہلے روکا اور ہلاک کردیا۔ دیگر 6 کلیئرنس آپریشن کے دوران مارے گئے تھے۔