جبری گمشدگیوں، سیاسی وابستگیوں میں تبدیلیوں، میڈیا اور سوشل میڈیا ورکرز کے خلاف کریک ڈاؤن اور خواتین کی قید سمیت دیگر اہم معاملات کے خلاف کارروائی کے معاملے پر پاکستان تحریک انصاف (پی ٹی آئی) نے صدرِ مملکت ڈاکٹر عارف علوی سے فوری نوٹس لینے کی استدعا کردی۔

تحریک انصاف کے مرکزی سیکرٹری جنرل عمر ایوب خان نے صدرِ مملکت کو خط لکھ دیا۔

عمر ایوب خان کی جانب سے لکھے گئے خط میں کہا گیا ہے کہ سیاسی وابستگیوں کو طاقت کے زور پر تبدیل کرنے کے لیے ملک میں جبری گمشدگیوں کا سلسلہ جاری ہے، اس سلسلے کے بعد پاکستان میں آزادانہ ، منصفانہ ، شفاف ، بروقت اور تمام فریقین کی شمولیت سے منعقد ہونے والے انتخابات کے لیے لیول پلینگ فیلڈ کی مکمل عدم موجودگی کے امکانات تیزی سے بڑھ رہے ہیں۔

عمر ایوب نے کہا کہ خواتین سیاسی کارکنان کو عدالتوں میں چالان پیش کیے بغیر لمبے عرصے کے لیے جیلوں میں قید کرنے اور ان سے خلافِ قانون سلوک کا سلسلہ بھی زور پکڑ رہا ہے، بطور صدرِ مملکت آپ جبری گمشدگیوں کے دہائیوں پر محیط سلسلے اور اس سے بین الاقوامی سطح پر پاکستان کے تشخص پر عائد ہونے والے منفی اثرات کی شدت سے بھی واقف ہیں۔

خط میں استدعا کی گئی ہے کہ اس ساری صورتحال کا فوری نوٹس لیں اور جمہوریت کے تسلسل، آئین کی بالادستی اور بنیادی انسانی حقوق کے احترام کی بحالی میں اپنا ناگزیر کردار ادا کریں۔