نگراں وزیراعلیٰ پنجاب محسن نقوی سے امریکا اور دیگر ممالک سے آئے سکھ یاتریوں کے وفد نے لاہور میں ملاقات کی ہے۔ وفد نے محسن نقوی کو روایتی چادر بھی پہنائی۔

وفد نے سکھ برادری کے مذہبی مقامات کی دیکھ بھال پر نگراں وزیراعلی پنجاب کا شکریہ ادا کیا۔

اس موقع پر محسن نقوی نے سکھ یا تریوں کے لئے بڑا اعلان کرتے ہوئے کہا کہ ’سکھ یاتریوں کو پاکستان آمد پر ویزا آن ارائیول دینے کی کوشش کررہے ہیں۔

وفاقی حکومت سے بات کی ہے، جلد خوشخبری دیں گے’۔

انہوں نے مزید کہا کہ ننکانہ صاحب میں سکھ برادری کے لئے کمیونٹی سینٹر بنا کر دیں گے۔

ان کا کہنا تھا کہ سکھ یاتریوں کے لئے پنجاب میں ٹورز کا خصوصی پیکیج لا رہے ہیں۔

محسن نقوی کا کہنا تھا کہ محکمہ سیاحت اس پیکج کو حتمی شکل دے رہا ہے، سکھ یاتری پیکیج کی آن لائن بکنگ کرا سکیں گے۔

وزیر اعلیٰ سے ملاقات میں سکھ یاتریوں کا کہنا تھا کہ جو مان سمان پنجاب میں ملا کوئی سوچ نہیں سکتا، پنجاب میں جو پیار اور خلوص ملا وہ فراموش نہیں کرسکتے۔