کراچی میں سندھ انسٹیٹیوٹ آف چائلڈ ہیلتھ کورنگی کے ڈاکٹرز نے بڑا کارنامہ انجام دیتے ہوئے نومولود کے دل کی کامیاب سرجری کی ہے۔

لیاقت آباد نمبر4 کے رہائشی بچے کو جناح اسپتال سے چائلڈ انسٹیٹیوٹ منتقل کیاگیا تھا، جہاں بچے کا آکسیجن لیول بہت کم تھا۔

دل کے دائیں خانے سے نکلنے والی شریان پھیپھڑوں میں جاتی ہے اور دل کے بائیں خانے سے نکلنے والی شریان خون سپلائی کرتی ہے تاہم متاثرہ بچے میں یہ سسٹم اس کے برعکس تھا۔

ڈاکٹر ارجمند کا کہنا ہے کہ جس وقت بچے کی پیدائش ہوئی تو نوٹس لیا گیا کہ آکسیجن لیول بہت کم تھا تاہم اب سرجری کے بعد بچے کی حالت بہتر ہے۔

ڈاکٹر کا کہنا ہے کہ اس قسم کی سرجری کے لئے کراچی میں صرف دو اسپتال ناکافی ہیں مزید اسپتالوں کی ضرورت ہے۔

نگراں وزیر صحت سندھ نے بھی نومولود کے دل کی کامیاب سرجری کو پاکستان میں طب کی دنیا میں بڑی کامیابی قرار دیتے ہوئے ڈاکٹرز اور پوری ٹیم کو خراج تحسین پیش کیا ہے۔