بھارت میں کھیلے جارہے آئی سی سی ون ڈے ورلڈ کپ کے آغاز سے قبل پاکستان کرکٹ ٹیم کے سیمی فائنل میں پہنچنے کی پیشگوئی کرنے والے سابق بھارتی کرکٹر سارو گنگولی نے قومی ٹیم سے متعلق ایک اور پیشگوئی کردی۔

پاکستان اس وقت ورلڈ کپ میں 3 میچز کھیل چکا ہے جس میں قومی ٹیم کو نیدرلینڈز اور سری لنکا کے خلاف کامیابی ملی اور بھارت کے خلاف میچ میں بدترین شکست ہوئی تھی۔

اب قومی ٹیم جمعہ (20 اکتوبر) کو بنگلورو میں آسٹریلیا کے مدمقابل ہوگی، بھارت سے شکست کے بعد سارو گنگولی نے بھارتی چینل پر گفتگو کرتے ہوئے پاکستان کے ورلڈ کپ میں مزید آگے جانے کو مشکل قرار دیا ہے۔

سارو گنگولی نے اپنے وقت میں ماضی کی پاکستانی کرکٹ ٹیم کو زیادہ بہتر قرار دیتے ہوئے کہا کہ ہمارے دور میں پاکستان ایک مختلف ٹیم تھی، یہ پاکستان ٹیم اس ٹیم جیسی نہیں ہے جس سے ہم کھیلا کرتے تھے۔

سابق بھارتی کپتان نے مزید کہا کہ یہ ٹیم بیٹنگ کے دوران دباؤ کو نہیں ہینڈل کرسکتی، اس بیٹنگ لائن کے ساتھ پاکستان کا اس ورلڈ کپ میں کم بیک کرنا مشکل ہوگا۔

واضح رہے کہ میگا ایونٹ کے آغاز سے قبل سارو گنگولی نے پیشگوئی کی تھی کہ آسٹریلیا، انگلینڈ اور بھارت ورلڈ کپ کے سیمی فائنل میں جاسکتی ہیں لیکن آپ اس ایونٹ میں نیوزی لینڈ کو نظر انداز نہیں کرسکتے لہٰذا وہ بھی سیمی فائنل میں پہنچ سکتی ہے۔

گنگولی نے 4 ٹیموں کا نام لینے کے بعد کہا تھا کہ میں سیمی فائنل کے لیے 5 ٹیموں کا انتخاب کروں گا اور اس فہرست میں پاکستان کو بھی شامل کروں گا۔

سارو گنگولی نے مزید کہا کہ میں چاہتا ہوں پاکستان سیمی فائنل کے لیے کوالیفائی کرے تاکہ ایڈن گارڈنز میں بھارت اور پاکستان کا مقابلہ ہو۔

مزید پرھیں

ورلڈ کپ: وریندر سہواگ نے پاکستان سے متعلق کیا پیشگوئی کی؟

’چٹھی میں کیا تھا؟‘، عرفان پٹھان کا نیدرلینڈ سے سوال

سابق بھارتی کرکٹر نے کس پاکستانی بولر کو موجودہ دور کا بہترین ڈیتھ بولر قرار دیا؟