بھارت میں ہونے والے آئی سی سی ورلڈکپ میں 14 اکتوبر کو پاک بھارت ٹاکرے کے دوران احمدآباد کے نریندرا مودی اسٹیڈیم میں چوری کے واقعات کا انکشاف ہوا ہے۔

بھارتی صحافی نے انکشاف کیا ہے کہ بھارت اور پاکستان کے درمیان میچ دیکھنے والے کرکٹ شائقین اپنے موبائل فونز، پرس سمیت کئی قیمتی اشیاء سے ہاتھ دھو بیٹھے۔

سماجی رابطے کی ویب سائٹ ایکس پربھارتی صحافی وکرانت گپتا کی ایک ویڈیو وائرل ہورہی ہے، ویڈیو میں انہیں خاصا ناراض دیکھا جاسکتا ہے۔

وائرل ویڈیو میں انہوں نے کہا کہ ’چند سیکنڈ کے اندر اندر چیزوں کا غائب ہونا حیران کن ہے۔ اسٹیڈیم میں 1 لاکھ 25 سے زائد تماشائی آتے ہیں تو سیکیورٹی کے مسائل ضرور ہوتے ہیں لیکن چوریاں ہماری ساکھ خراب کررہی ہیں‘۔

مزید پڑھیں:

انوشکا شرما پاک بھارت ٹاکرا دیکھنے احمد آباد پہنچ گئیں

ورلڈکپ: پاکستان کی مایوس کن کارکردگی، بھارت نے 7 وکٹوں سے دھول چٹادی

ورلڈکپ کے ابتدائی 10 میچز میں کتنے ورلڈ ریکارڈ بنے؟

صحافی نے دعویٰ کیا کہ پاک بھارت میچ کے دوران کئی سو لوگوں نے اپنے فون، بٹوے اور دیگر قیمتی سامان چوری ہونے کی اطلاعات دی ہیں۔

اس سے قبل بھارتی اداکارہ اور ماڈل اروشی روٹیلا نے بھی اپنے مہنگے ترین آئی فون کی گمشدگی کے بارے میں سوشل میڈیا پر ایک پوسٹ شیئر کی تھی۔

خیال رہے کہ بھارتی ٹیم نے گرین شرٹس کے خلاف یکطرفہ میچ میں شاندار اننگز کھیل کر جیت اپنے نام کی تھی۔