پاکستان سمیت دنیا بھر میں آج بھی فلسطین کے حق میں مظاہرے کیے گئے۔ احتجاج کے شرکاء نے مطالبہ کیا کہ اسرائیل غزہ میں فوجی کارروائیاں فوری طور پر روکے اور انسانی حقوق کی پامالی سے باز رہے۔

پاکستان کے شہری جہاں غزہ میں اسرائیلی وحشیانہ کارروائیوں کے خلاف سڑکوں پر نکل رہے ہیں وہاں بین الاقوامی سطح پر بھی فلسطینیوں کے حق میں آواز بلند کی جارہی ہے۔

مختلف ممالک میں غزہ میں ڈھائے جانے والے انسانیت سوز مظالم کےخلاف آواز بلند کی جارہی ہے۔ لاکھوں شہری گھروں سے باہر آکر احتجاج کررہے ہیں۔

برطانیہ میں فلسطین کا پرچم لہرانے پر پابندی کے اعلان کے باوجود ہزاروں افراد فلسطینی پرچم اٹھائے سڑکوں پر نکلے۔

عالمی خبر رساں ادارے کے مطابق لندن اور مانچسٹر سمیت برطانیہ بھر میں ہزاروں افراد فلسطینیوں کی حمایت میں گھروں سے باہر نکلے۔

لندن میں فلسطین کے حق میں بڑا احتجاجی مظاہرہ کیا گیا، برطانوی وزیراعظم کی رہائش گاہ 10 ڈاؤننگ اسٹریٹ اور بی بی سی کے دفتر کے باہر مظاہرے کئے گئے۔

مظاہرین نے غزہ پر گزشتہ سات روز سے جاری اسرائیل کی وحشیانہ بمباری فوری طور پر بند کرنے کا مطالبہ کیا۔