نگراں وزیراعلیٰ سندھ جسٹس (ر) مقبول باقر نے کراچی کے علاقے شاہ فیصل ٹاؤن میں عمارت گرنے کا نوٹس لیتے ہوئے سندھ بلڈنگ کنٹرول اتھارٹی کے ڈائریکٹر سمیت 4 افسران کو معطل کردیا۔

نگراں وزیراعلیٰ سندھ نے گزشتہ روز شاہ فیصل ٹاؤن میں زیر تعمیر عمارت گرنے سے 5 جانیں ضیاع ہونے کا سخت نوٹس لیتے ہوئے سندھ بلڈنگ کنٹرول اتھارٹی کے ڈائریکٹر سمیت 4 افسران کو معطل کردیا۔

شاہ فیصل کالونی میں گزشتہ روز زیر تعمیر عمارت گرنے سے 5 افراد جاں بحق اور 4 زخمی ہوئے تھے۔

وزیراعلیٰ جسٹس (ر) مقبول باقر نے شدید برہمی کا اظہار کرتے ہوئے ایس بی سی اے سے سوال کیا کہ انہوں نے پلاٹ پر تعمیرات کی اجازت کیسے دی؟ اگر ایسی تعمیرات جس میں انسانی ضیاع کے خطرات تھے تو اسکی اجازت کیوں دی گئی اور اس طرح کی کسی قیمت پر اجازت نہیں دی جائے گی۔

معطل کیے گئے افسران میں ڈائریکٹر ایس بی سی اے کورنگی سید محمد ضیاء، اسسٹنٹ ڈائریکٹر وسیم راجہ تھہیم، سینئر بلڈنگ انسپکٹر تنویر خان اور بلڈنگ انسپکٹر خرم رضوان شامل ہیں۔

دریں اثنا نگراں وزیراعلیٰ سندھ کے حکم پر تحقیقات کے لیے انکوائری کمیٹی بھی تشکیل دے دی گئی، انکوائری کمیٹی 48 گھنٹوں میں رپورٹ پیش کرے گی۔