پنجاب کے شہر فیصل آباد میں تاندلیا نوالہ کے احاطہ عدالت میں وکیل پرحملہ کرنے والی نامعلوم برقع پوش خاتون جوابی فائرنگ میں جاں بحق ہوگئیں۔

تاندلیا نوالہ کے احاطہ عدالت میں نامعلوم خاتون نے فائرنگ کرکے ایڈوکیٹ ملک صدیق کو زخمی کردیا۔

وکیل ملک صدیق اعوان کے گارڈز نے جوابی فائرنگ کردی، جس کے نتیجے میں خاتون موقع پر ہی ہلاک ہوگئیں۔ واقعے کی اطلاع ملتے ہی پولیس کی بھاری نفری موقع پر پہنچ گئی ہے۔

پولیس ذرائع کے مطابق برقع پوش خاتون کی شناخت فرحت نام سے ہوئی، جو چک431 کی رہائشی ہیں۔ حملہ آور خاتون کا تعلق تہرے قتل کے خاندان سے ہے اور ایڈووکیٹ صدیق اعوان مخالف پارٹی کے وکیل تھے، جبکہ واقعے کی مزید تحقیقات کی جارہی ہیں۔

پولیس نے حملہ آور خاتون کے ساتھ ہونے کے شبہ میں ایک خاتون سمیت 2 افراد کو حراست میں لیا ہے۔