نگراں وزیرخارجہ جلیل عباس جیلانی نے تبت میں منگولیا کے نائب وزیراعظم سین بویان سے ملاقات کی، جس میں دونوں ممالک کے درمیان تعلقات کو مزید گہرا کرنے پر اتفاق کیا گیا۔

نگراں وزیرخارجہ کا تبت کے دورے پر موجود ہیں، جہاں جلیل عباس جیلانی کی منگولیا کے نائب وزیراعظم سے ملاقات ہوئی ہے۔

ملاقات میں دونوں ممالک کے درمیان تعلقات کو مزید گہرا کرنے اور کان کنی، زراعت اور ٹیکسٹائل کے شعبے میں تعاون بڑھانے پر اتفاق ہوا ہے۔

بین الاقوامی تعاون سے متعلق ٹرانس ہمالیہ فورم آج چین کے شہر نائنگچی میں شروع ہورہا ہے۔

نگراں وزیر خارجہ جلیل عباس جیلانی 2 روزہ فورم میں پاکستان کی نمائندگی کریں گے جبکہ وہ فورم کی افتتاحی تقریب سے خطاب بھی کریں گے۔

ٹرانس ہمالیہ فورم کا 2018 میں آغاز کیا گیا تھا جس کا مقصد علاقائی ممالک میں جغرافیائی روابط، ماحولیاتی تحفظ اور حیاتیات کو محفوظ بنانے سمیت مختلف شعبوں میں عملی تعاون کو فروغ دینا ہے، اس سال فورم کا موضوع ’’حیاتیاتی تنوع اور ماحولیاتی تحفظ‘‘ ہے۔