نگراں وزیراعلیٰ پنجاب محسن نقوی نے ایف آئی آر میں تاخیر پر آئی جی پر برہمی کا اظہار کرتے ہوئے کہا کہ تھانوں سے انصاف، 24 گھنٹوں میں ایف آئی آر کے اندراج کا بورڈ پھاڑدیں، آپ تھانوں کی حالت بدلنا ہی نہیں چاہ رہے۔

نگراں وزیراعلی پنجاب محسن نقوی نے سگیاں کے قریب فیکٹری ایریا تھانے کا اچانک دورہ کیا، اور چوری کے پرچوں میں تاخیر پر آئی جی پنجاب پر برہم ہوئے۔

محسن نقوی نے آئی جی پنجاب عثمان انور سے مکالمہ کرتے ہوئے کہا کہ آپ تو کہتے ہیں 24 گھنٹوں میں چوری کی ایف آئی آر ہو گی، لیکن تھانے میں 4،4 دن سے ایف آئی آر درج نہیں ہو رہی۔

نگراں وزیراعلیٰ نے سخت مکالمہ کرتے ہوئے کہا کہ آئی جی صاحت تھانوں سے انصاف، 24 گھنٹوں میں ایف آئی آر کے اندراج کا بورڈ پھاڑ دیں، آپ تھانوں کی حالت بدلنا ہی نہیں چاہ رہے۔

آئی جی پنجاب نے وزیر اعلی کو بتایا کہ جس ایف آئی آر کی آپ بات کر رہے وہ چوری کی نہیں۔

اسٹاف نے آئی جی پنجاب کو بتایا محسن نقوی جس پرچے کی بات کر رہے وہ چوری کا ہی ہے، تاہم آئی جی پنجاب پہلے تو وزیر اعلی کو پرچے میں تاخیر پر بریف کرتے رہے۔

نگراں وزیراعلی محسن نقوی نے ایف آئی آر میں تاخیر پر ایس ایچ او کوعہدے سے ہٹانے کا حکم دے دیا۔ اور وزیر اعلی کے حکم پرآئی جی پنجاب نے بھی فوری ایس ایچ کوہٹانے کا کہہ دیا۔