سکھ رہنماؤں نے کینیڈین وزیراعظم کے اقدام کا خیر مقدم کیا ہے۔ تحریک خالصتان کے سرگرم رکن ہردیپ سنگھ نجر کے قتل کے بعد کینیڈین وزیراعظم کے واضح مؤقف کو دنیا بھر میں پذیرائی ملی۔

سکھ برادری کی جانب سے کینیڈین وزیراعظم جسٹن ٹروڈو کے بیانات اور تحقیقاتی عمل کو بے حد سراہا جارہا ہے۔

سکھ رہنماؤں کا کہنا تھا کہ کینیڈین وزیراعظم نے اپنی پارلیمنٹ میں واضح طور پر کہا کہ ہر دیپ سنگھ کے قتل میں بھارتی ایجنسیاں ملوث ہیں۔

گروندر سنگھ کا کہنا ہے کہ کینیڈین وزیراعظم نے ملکی سربراہ کی حیثیت سے انتہائی ذمہ داری سے بات کی ہے۔

انھوں نے کہا کہ ’کینیڈین سیاست اور سکھوں کے معاملات میں بھارت کی دخل اندازی خطرناک ہے‘۔

ان کا کہنا تھا کہ جسٹن ٹروڈو نے سکھوں کے لئے آواز اٹھا کر ثابت کیا کہ وہ ذمہ دار ریاست کے سربراہ ہیں۔

سکھ رہنما گیانی رگھبیر کا کہنا ہے کہ ہردیپ سنگھ کے قتل نے ماضی میں ہونے والے سکھوں کے قتل عام کی یاد تازہ کردی، حالیہ قتل کی جتنی مذمت کی جائے کم ہے۔