پاکستان پیپلزپارٹی (پی پی پی) نے الیکشن شیڈول نہ جاری کرنے پر اپنا مؤقف الیکشن کمیشن کے سامنے رکھ دیا جبکہ وفد نے حلقہ بندیوں سے متعلق خدشات اور تجاویز بھی الیکشن کمیشن پہنچا دیں۔

پیپلزپارٹی کے رہنما قمرزمان کائرہ اور امتیاز صفدر وڑائچ الیکشن کمیشن آئے، پیپلز پارٹی کے رہنماؤں نے الیکشن کمیشن حکام سے ملاقات کی۔

ذرائع کے مطابق پیپلزپارٹی کے وفد نے الیکشن شیڈول نہ جاری کرنے پراپنا موقف الیکشن کمیشن کے سامنے رکھا اور شیڈول جاری کرنے کا مطالبہ کیا۔

ذرائع نے بتایا کہ پیپلز پارٹی وفد نے حلقہ بندیوں سے متعلق اپنے خدشات اور تجاویز بھی الیکشن کمیشن کے سامنے رکھیں۔

قمرزمان کائرہ نے اپنے حلقہ انتخاب سے متعلق مسائل بھی الیکشن کمیشن حکام کو بتائے۔

واضح رہے کہ گزشتہ روز الیکشن کمیشن عام انتخابات جنوری 2024 کے آخری ہفتے میں کروانے کا اعلان کرچکا ہے۔