ایم ڈی کیٹ ٹیسٹ میں نقل کے اسکینڈل کی تحقیقات کیلئے جوائنٹ انویسٹی گیشن ٹیم نے ایٹا کے دفتر کا دورہ کیا جہاں ایٹا حکام نے نقل میں ملوث امیدواروں کے خلاف ایف آئی آرز درج نہ ہونے کی شکایت کی۔

ذرائع کے مطابق ایٹا حکام نے سفارش کی کہ ملوث امیدواروں کے خلاف ایف آئی آرز درج کی جائیں۔

جے آئی ٹی ذرائع کا کہنا ہے کہ اس حوالے سے بنوں اور ڈی آئی خان پولیس سے جواب طلب کرلیا گیا ہے۔

مزید پڑھیں: ایم ڈی کیٹ ٹیسٹ اسکینڈل، جے آئی ٹی نے ماسٹر مائنڈ کی شناخت کرلی

ذرائع کے مطابق ایٹا حکام نے جے آئی ٹی کو ٹیسٹ کے طریقہ کاراور ایس او پیز سے متعلق آگاہ کیا، جے آئی ٹی کو پرچوں کی تیاری، ترسیل اور نتائج کے حوالے سے بھی بریفنگ دی گئی۔

جےآئی ٹی ٹیم نے ٹیسٹ کے مختلف پہلوؤں سے متعلق سوالات کئے۔

یاد رہے کہ خیبرپختونخوا میں 10 ستمبر کو ہونے والا ایم ڈی کیٹ کا امتحان متنازع ہوچکا ہے، ایک طرف پرچہ لیک ہونے کی خبریں سامنے آئیں تو دوسری جانب جدید ٹیکنالوجی کی مدد سے بڑے پیمانے پر نقل کا رجحان بھی دیکھنے کو ملا۔