ایشیا کپ سے باہر ہونے کے بعد پاکستان کرکٹ بورڈ نے اہم اقدامات کا فیصلہ کیا ہے اور قومی کرکٹر کو فٹ رکھنے کے لئے پی ایس ایل کے علاوہ صرف ایک لیگ کھیلنے کی اجازت دینے کا فیصلہ کیا ہے۔

پاکستان کرکٹ ٹیم گزشتہ روز سری لنکا کے ہاتھوں شکست کے بعد ایشیا کپ سے باہر ہوگئی ہے، جس کے بعد پی سی بی مینجمنٹ کمیٹی کے سربراہ ذکاء اشرف نے ہائی پروفائل میٹنگ طلب کرلی ہے۔

اجلاس میں چیف سلیکٹر انضمام الحق، سربراہ کرکٹ کمیٹی مصباح الحق، ممبر کرکٹ کمیٹی محمد حفیظ اور نامور کرکٹر شرکت کریں گے۔

ہائی پرفائل میٹنگ میں سری لنکا کے ہاتھوں شکست کے اسباب سامنے لائے جائیں گے، اور اجلاس میں سامنے آنے والے اسباب کی روشنی میں اہم فیصلے کئے جائیں گے۔

ذکاء اشرف پی سی بی مینجمنٹ کمیٹی کا کہنا ہے کہ قومی کرکٹرز کو پی ایس ایل کے علاوہ صرف ایک اور لیگ کھیلنے کی اجازت ہوگی، پی سی بی نے یہ شق قومی کرکٹرز کے سنٹرل کنٹریکٹ میں شامل کردی ہے، نیشنل ڈیوٹی کی صورت میں قومی کرکٹرز کو غیر ملکی ایک اور لیگ کھیلنے کی بھی اجازت نہیں، پابندی کا مقصد کھلاڑیوں کوفٹ رکھنا ہے۔