نئی دہلی میں اتوار کی صبح جی 20 سربراہی اجلاس کے موقع پر محمد بن سلمان نے بنگلہ دیش کی وزیر اعظم شیخ حسینہ واجد کے ساتھ ملاقات میں انہیں یقین دہانی کرائی کہ سعودی عرب بنگلہ دیش کے ساتھ مل کر تمام ممکنہ شعبوں میں تعاون بڑھانے کے لیے کام کرے گا۔

بنگلہ دیش کی وزارت خارجہ کے مطابق حسینہ واجد کی محمد بن سلمان سے بہت نتیجہ خیز ملاقات ہوئی۔

سعودی ولی عہد نے بنگلہ دیش کی وزیر اعظم کی جانب سے حالیہ برسوں میں قابل ذکر سماجی و اقتصادی ترقی حاصل کرنے میں متاثر کن قیادت کی تعریف کی۔

شہزادہ سلمان نے سعودی سرمایہ کاروں کی جانب سے بنگلہ دیش کے مختلف منصوبوں بشمول پتنگا ٹرمینل، پائرہ بندرگاہ اور ACUWA قابل تجدید توانائی کے منصوبے میں جاری سرمایہ کاری پر اپنے اطمینان کا اظہار کیا۔

انہوں نے وزیر اعظم کو بتایا کہ تقریباً 2.8 ملین بنگلہ دیشی اپنی محنت اور مستعدی سے ان کے ملک کی معیشت میں اہم حصہ ڈال رہے ہیں۔

محمد بن سلمان نے 2030 ورلڈ کپ کا میزبان بننے کے لیے سعودی عرب کی حمایت کرنے پر حسینہ واجد کا شکریہ بھی ادا کیا۔

بنگلہ دیش کی وزیر اعظم نے سعودی ولی عہد کو سعودی عرب میں متعدد سماجی اصلاحات شروع کرنے اور اسے کامیاب بنانے اور حالیہ دنوں میں متعدد سفارتی کامیابیاں حاصل کرنے پر مبارکباد دی۔

انہوں نے محمد بن سلمان کو بنگلہ دیش کے دورے کی دعوت بھی دی۔

شہزادہ سلمان نے ان کی دعوت قبول کرتے ہوئے بنگلہ دیش کا دورہ کرنے پر آمادگی ظاہر کی۔