نگراں وزیراعلیٰ سندھ مقبول باقر نے سینٹرل پولیس آفیس کراچی کا دورہ کیا اور چہلم پر بہتر سکیورٹی انتظامات پر شاباشی دی۔ مقبول باقر کا کہنا تھا کہ امن و امان کی صورتحال جلد بہتر ہو جائے گی۔

سینٹرل پولیس آفیس پہنچنے پر جسٹس (ر) مقبول باقر کا استقبال آئی جی سندھ پولیس راجا رفعت مختار نے کیا۔

نگراں وزیر اعلیٰ نے چہلم کے جلوس اور مجالس کی سکیورٹی کا کمانڈ اینڈ کنٹرول سینٹر سے جائزہ لیا۔ مقبول باقر کو آئی جی پولیس نے جلوس کے سکیورٹی انتظامات سے متعلق بریف کیا۔

اس کے علاوہ وزیراعلیٰ سندھ نے نمائش پر علامہ شہنشاہ نقوی کی مجلس سنی اور ان سے ملاقات کی۔

نگراں وزیر اعلیٰ نے مختلف علاقوں کا دورہ کیا اور صدر میں میڈیا سے گفتگو میں کہا کہ آج کا دن عقیدت اور احترام کا دن ہے ، تمام مکاتب فکر کے علماء کا ایک دوسرے کے عقائد کے احترام پر شکریہ ادا کرتا ہوں۔

انھوں نے کہا کہ سندھ حکومت نے چہلم کے موقع پر سکیورٹی کے فول پروف انتظامات کیے۔

ان کا کہنا تھا کہ اسٹریٹ کرائم کے خلاف کارروائی کی جا رہی ہے، امن و امان کی صورتحال جلد بہتر ہو جائے گی۔

یہ بھی پڑھیں :

کور کمانڈرز کانفرنس، معاشی سرگرمیوں کی مکمل حمایت، دہشتگردوں سے پوری ریاستی طاقت کے ساتھ لڑنے کا عزم

کچے کے جرائم پیشہ افراد کے تانے بانے کالعدم ٹی ٹی پی کے ساتھ ملتے ہیں

مقبول باقر نے مزید کہا کہ کچے میں جو لوگ اغوا کیے گئے تھے وہ بازیاب ہوگئے ہیں، ابھی بھی 2 افراد ڈاکوؤں کے قبضے میں ہیں، انہیں بھی جلد بازیاب کروایا جائے گا، اور صوبے میں قانون کی حکمرانی ہوگی۔