کراچی کے علاقے پی آئی بی کالونی میں واقع ایک گھر سے 17 سال کی لڑکی کی لاش ملنے کا مقدمہ مقتولہ فضا کے بھائی فہد علی کی مدعیت میں درج کرلیا گیا ہے۔

پولیس کے مطابق مقدمہ ڈکیتی کے دوران قتل کی دفعات کے تحت تھانہ پی آئی بی کالونی میں شہباز، جنید، حسن اور علی نامی افراد کے خلاف درج کیا گیا ہے۔

مقتولہ کے بھائی فہد علی کا کہنا ہے کہ نامزد ملزمان محلے میں ہی رہتے ہیں جو گھر میں دروازہ توڑ کر داخل ہوئے، بہن کو قتل کیا اور زیورات لوٹ کر فرار ہوگئے۔

فہد علی کے مطابق واقعہ کے وقت والدہ بینک گئی ہوئی تھیں اور گھر پر کوئی نہیں تھا۔

ایف آئی آر کے مطابق والدہ گھر واپس آئیں تو دروازہ ٹوٹا ہوا تھا اور بہن کی لاش پڑی تھی، جس کے سر اور چہرے پر زخم تھے، لاش پر بستر اور کپڑے ڈالے گئے تھے اور گھر سے زیورات کے 5 سیٹ غائب تھے۔

فہد علی نے ایف آئی آر میں بتایا کہ نامزد ملزمان زینے کا دروازہ توڑ کر گھر میں داخل ہوئے، بہن کو مزاحمت پر مارپیٹ کرکے گلے میں پھندا ڈال کر مار ڈالا۔

پولیس حکام کا کہنا ہے کہ مقدمے میں نامزد ایک ملزم کو گرفتار کرلیا ہے، دیگر ملزمان کی گرفتاری کے لیے چھاپے مارے جارہے ہیں۔