ملک بھر میں بجلی کے بھاری بھر کم بلو کے باعث ہر شخص پریشان ہے، جبکہ احتجاجی مظاہروں کا سلسلہ بھی جاری ہے، ایسے میں شوبز انڈسٹری سے تعلق رکھنے والی شخصیات بھی خاموش نہیں ہیں۔

پاکستانی شوبز انڈسٹری کی نامور اداکارہ نادیہ خان نے اپنے یوٹیوب چینل پر ایک ویڈیو شئیر کی ہے جس میں ندا یاسر، فضا علی، سعدیہ امام اور نادیہ خان خود اپنے بجلی کے بھاری بلوں کی تفصیلات بتارہی ہیں۔

نادیہ خان نے بتایا کہ میں تین ہفتے کیلئے تھائی لینڈ میں موجود تھی اور گھر پر کوئی نہیں تھا لیکن اس کے باوجود 75 ہزار روپے کا بل آیا ہے۔

نادیہ خان نے کہا کہ اب اے سی کو بہت کنجوسی سے استعمال کرنا پڑے گا اور بچوں کو بھی عادت ڈالنا ہوگی کہ اے سی کا درجہ حرارت 26 ڈگری سینٹی گریڈ سے کم نہ کریں۔

انہوں نے شوبز انڈسٹری کی دیگر اداکاراؤں سے بھی بجلی کے بل کے بارے میں دریافت کیا۔

اداکارہ سعدیہ امام نے نادیہ خان سے گفتگو میں بتایا کہ اس دفعہ میرا بجلی کا بل 67 ہزار روپے آیا، میں نے قیمتیں زیادہ ہونے کے باوجود گھر کو سولر پر منتقل کروایا، اب 19 ہزار روپے کا بل آیا ہے۔

اداکارہ و ماڈل فضا علی نے بتایا کہ ہمارے گھر 67 ہزار روپے بجلی کا بل آیا، میں اور میرے شوہر اے سی استعمال نہیں کرتے، میں تو گاڑی بھی اس کا استعمال نہیں کرتی۔

مارننگ شو ہوسٹ ندا یاسر نے انکشاف کیا کہ اگست میں ان کی فیملی آدھے مہینے گھر میں تھی ہی نہیں پھر بھی بجلی کا بل ایک لاکھ روپے آیا، انہوں نے بتایا کہ وہ گھر میں دن کے اوقات میں اے سی استعمال نہیں کرتیں، رات کو پوری فیملی ایک کمرے میں سوتی ہے اور صرف ایک اے سی استعمال ہوتا ہے۔

ندا کے مطابق وہ بھی گھر میں سولر سسٹم لگوانے کا سوچ رہی ہیں لیکن سولر بہت زیادہ مہنگا ہوگیا ہے، جو پہلے آٹھ لاکھ کا تھا، پھر 15 کا ہوا، اب سنا ہے 22 یا 25 لاکھ کا ہوگیا ہے۔