پاکستان میں جمعہ کے روز خبریں گردش کرنے لگیں کہ چیئرمین نادرا کے عہدے پر ایک فوجی افسر کو تعینات کر دیا گیا ہے جبکہ یہ دعوی بھی کیا گیا کہ آئی ایس ائی کے سربراہ تبدیل کیے جا رہے ہیں۔ تاہم ذرائع کا کہنا ہے کہ ان دونوں خبروں میں کوئی صداقت نہیں۔

اینکر پرسن فریحہ ادریس نے ایک ٹوئیٹ میں دعوی کیا کہ لیفٹیننٹ جنرل شاہد امتیاز کو نیا ڈی جی ائی ایس ائی تعینات کر دیا گیا ہے۔

اسی ٹویٹ میں انہوں نے یہ دعوی بھی کیا کہ لیفٹنٹ جنرل نعمان ذکریا کو نیشنل ڈیٹا بیس رجسٹریشن اتھارٹی کے چیئرمین کے عہدے پر تعینات کر دیا گیا ہے۔

یہ دعوی ایسے موقع پر کیا گیا جب نگران وزیر اعظم انوار الحق کاکڑ نے تصدیق کی کہ چیئرمین نادرا کی تعیناتی کے حوالے سے قواعد میں تبدیلی کی گئی ہے۔ جمعرات کے روز اینکر پرسن سے گفتگو میں نگران وزیراعظم کا کہنا تھا کہ یہ اقدام ملک کی سیکیورٹی صورتحال کے پیش نظر اٹھایا گیا ہے۔

یاد رہے کہ چیئرمین نادرا طارق ملک 13 جون کو مستعفی ہو گئے تھے۔ ان کے خلاف ایف ائی اے میں تحقیقات چل رہی تھیں جن کا تعلق ڈیٹا لیک کے ایک مبینہ واقعے سے ہے۔

فریحہ ادریس کی جانب سے دعوے کے بعد سوشل میڈیا پر افواؤں کا بازار گرم ہو گیا تاہم ذرائع نے بتایا کہ ان دونوں خبروں میں کوئی صداقت نہیں۔