بلوچستان کے نگراں مشیر معدنیات عمیر محمد حسنی نے ٹراما سینٹر سول اسپتال میں رونما ہونے والے ناخوشگوار واقعہ پر ٹراما سینٹر کے ڈاکٹروں اور دیگر اسٹاف سے دلی معذرت کرلی ہے۔

صوبائی مشیر معدنیات عمیر محمد حسنی نے سول اسپتال ٹراما سینٹر کوئٹہ کا دورہ کیا تھا۔ صوبائی مشیر کے ہمراہ 10 سے زائد مسلح محافظ اور تقریبا 30 سے زائد دیگر افراد موجود تھے۔

اسپتال انتظامیہ نے مسلح محافظ اور دیگر افراد کو ٹراما سینٹر میں جانے سے روکنے کی کوشش کی تو صوبائی مشیر کے مسلح محافظوں نے اسپتال حکام کو مبینہ زد و کوب کیا۔

جس پر ٹراما سینٹر کے عملے نے صوبائی مشیر کے رویے کے خلاف کام روک کر احتجاج کیا۔ ڈاکٹرز اور پیرا میڈیکل اسٹاف اور دیگر ٹراما سینٹر کے عملے نے اسپتال خالی کردیا تھا۔

اپنے ایک بیان میں نگراں صوبائی مشیر نے تسلیم کیا ہے کہ یہ ایک افسوسناک واقعہ تھا جو ایک غلط فہمی کی بنیاد پر رونما ہوا۔

صوبائی مشیر نے کہا کہ ذمہ دار حکومتی نمائندہ کی حیثیت سے عوام کی خدمت ان کی ذمہ داری ہے، خاص طور پر پہلے سے مختلف امراض میں مبتلا مریضوں کی داد رسی ان کا اخلاقی فریضہ بھی ہے۔

انھوں نے ٹراما سینٹر کے فرض شناس اسٹاف کو یقین دہانی کرائی ہے کہ آئندہ سے وہ خود بھی ایسے ناخوشگوار واقعات کی روک تھام میں اپنا کردار ادا کریں گے۔

اسپتال ذرائع کا کہنا ہے کہ نگراں صوبائی مشیر کے دورے سے متعلق اسپتال حکام کو پہلے ہی اطلاع دی گئی تھی۔