بھارت میں چیمپئنز ٹرافی سے واپسی پر قومی ہاکی ٹیم کے آفیشلز آپس میں لڑ پڑے۔ ہیڈ کوچ محمد ثقلین اور منیجر عمر صابر کے درمیان جھگڑا ہوا۔ یہ انکشاف بھی ہوا ہے کہ ٹیم منیجر نے 70 ہزار بھارتی کرنسی کی سرکاری رقم سے شاپنگ بھی کی تھی، تاہم اس الزام کی تصدیق نہیں ہوسکی۔

جھگڑا کھلاڑیوں کی بس نیشنل ہاکی اسٹیڈیم لاہور کے بجائے ڈیفنس ہاکی ایرینا لے جانے اور مینجر کی جانب سے ٹیم کا سامان اپنے پاس رکھنے پر ہوا۔

ذرائع کے مطابق ڈیفنس ایرینا میں منیجر عمر صابر نے ادویات اور پروٹین کے ساشے اتروا لیے، ساتھ ہی پنالٹی کارنرز لگوانے کی تیاری کا سامان اور بالز بھی رکھ لی۔

واقعہ کے حوالے سے ذرائع نے مزید بتایا کہ ہیڈ کوچ محمد ثقلین نے منیجر کو سامان لینے سے روکا تو جھگڑا شروع ہوگیا۔

اس موقع پر ہیڈ کوچ نے مؤقف اپنایا کہ یہ سامان فیڈریشن کی ملکیت ہے، ایشین گیمز کی تیاری کے کیمپ میں بھی یہ سامان استعمال کرنا ہے۔

جس پر ٹیم منیجرعمر صابر نے جواب دیا کہ ڈی ایچ اے ٹیم کا اسپانسرز ہے، سامان اور ادویات پر ان کا حق ہے۔

یہ بھی پڑھیں : ایشین چیمپئنز ٹرافی: بھارت سے شکست کے بعد پاکستان سیمی فائنل کی دوڑ سے باہر

ذرائع نے دعویٰ کیا کہ منیجر بھارت میں منعقدہ چیمپئنز ٹرافی کے دوران آفیشل میٹنگز اور ناشتے پر بھی نہیں آتے تھے، منیجر نے 70 ہزار بھارتی کرنسی کی سرکاری رقم سے شاپنگ بھی کی تھی۔