گہری رنگت کی وجہ سے شوہر کی تذلیل ظلم ہے،عدالتی فیصلہ

عدالت نے شوہروں کے حق میں فیصلہ سُنادیا

ویب ڈیسک

شائع 09 اگست 2023 11:16am

لائف اسٹائل

بھارتی ریاست کرناٹک کی ہائیکورٹ نے شوہروں کے حق میں فیصلہ دیتے ہوئے کہا کہ کسی بھی شخص کی بیوی جو شوہر کی گہری رنگ کی وجہ سے اس کی تذلیل کرنے کی مرتکب ہوتی ہے، ظلم کے مترادف ہے۔ یہ بات طلاق لینے کے لیے ایک مضبوط دلیل بن جائے گی۔

ہائیکورٹ کے دو ججز سٹس الوک آرادھے اور جسٹس آننت رام ناتھ ہیگڑے پر مشتمل ڈویژن بینچ نے یہ فیصلہ ایک درخواست پرکیا جس میں 44 سالہ شخص اپنی 41 سالہ بیوی سے طلاق لینا چاہتا تھا۔

رپورٹ میں بتایا کہ 2012 میں شوہر نے بنگلور کی فیملی کورٹ میں طلاق کے لیے درخواست دائر کی تھی۔ اس جوڑے کی شادی 2007 میں ہوئی تھی، ان کی ایک بیٹی بھی ہے لیکن عدالت نے درخواست 2017 میں مسترد کردی تھی جس کے بعد درخواست گزار نے ہائیکورٹ سے رجوع کیا۔

عدالت نے کہا کہ شواہد سے معلوم ہوتا ہے کہ بیوی شوہر کی سیاہ رنگت کی وجہ سے اس کی تذلیل کیا کرتی تھی اور اسی وجہ سے وہ اس سے الگ رہنے لگی تھی۔

عدالت نے مزید کہا کہ بیوی نے اس بات کو چھپانے کے لیے شوہر کے خلاف غیر ازدواجی تعلقات رکھنے کے جھوٹے الزامات عائد کیے۔

خاتون نے الزام عائد کیا تھا کہ اس کے شوہر کے دوسری عورت کے ساتھ ناجائز تعلقات ہیں اور دونوں کا ایک بچہ بھی ہے۔ اس کا کہنا تھا کہ سسرال والے جہیز کا مطالبہ کرتے ہیں اور اسے بیٹی کے ساتھ گھر سے باہرجانے کی اجازت نہیں دیتے ہیں۔

کرناٹک کی ہائیکورٹ نے فیصلے میں کہا کہ بیوی نے شوہر کے ساتھ معاملات بہتر کرنے کی بھی کوشش نہیں کی اور شواہد نشاندہی کرتے ہیں کہ وہ اپنے شوہر کی سیاہ رنگت کی وجہ سے شادی کو مزید قائم رکھنے میں دلچسپی نہیں رکھتی۔

عدالت نے مزید کہا کہ ’گہری رنگت‘ جذبات مجروح کرنے کے لیے ہتھیار کے طور پر استعمال کیا گیا، جو ظلم کے مترادف ہے۔

ہندو میرج ایکٹ کی شق 13 اے کے تحت اگر کوئی فریق اپنے جارحانہ رویے سے دوسرے فریق کو ذہنی پریشانی میں مبتلا کرتا ہے تو یہ شادی ختم کرنے کے لیے کافی وجہ ہے۔