گلشن حدید فیز 1 میں نوجوان کو گھر کی دہلیز پر لوٹ لیا گیا، واقعے کی سی سی ٹی فوٹیج بھی سامنے آگئی ہے۔

شہر قائد میں لوٹ مار کا بازار گرم ہے، شہری غیر محفوظ ہیں اور کوئی ان کا پرسان حال نہیں، عوام اب اپنے گھروں کی دہلیز پر بھی لٹ رہے ہیں، ایسا ہی واقعہ گلشن حدید فیز 1 میں پیش آیا جہاں ڈاکوؑں نے نوجوان کو گھر کی دہلیز پر لوٹ لیا۔

واقعہ کی سی سی ٹی وی فوٹیج منظر عام پر آگئی ہے، جس میں واضح طور پر دیکھا جاسکتا ہے کہ ایک شخص اپنے گھر کے باہر بیٹھے ہوئے موبائل استعمال کررہا ہے، کہ عقب سے موٹرسائیکل پر سوار ملزمان آجاتے ہیں۔

نوجوان ملزمان کو دیکھ کر گھر کی جانب بھاگتا ہے اور دروازے میں داخل بھی ہوجاتا ہے لیکن شاطر ملزمان نے نوجوان کو دبوچ لیا اور گھر کے دروازے پر بھی لوٹ مار کرتے ہیں، اس دوران ملزمان کا ایک ساتھی موٹرسائیکل پر موجود رہتا ہے، اور لوٹ مار کرنے کے بعد ملزمان باآسانی فرار ہوجاتے ہیں۔