نگراں وزیر اعلیٰ پنجاب نے سروسز اسپتال کی اپ گریڈیشن کا ماسٹر پلان طلب کرتے ہوئے کہا کہ سروسز اسپتال کو پنجاب کا بہترین اسپتال بنانا چاہتے ہیں۔ محسن نقوی نے ایل ڈی اے کے مالی سال 2023-24 کے بجٹ کی منظوری بھی دے دی۔

نگراں وزیراعلیٰ پنجاب کی زیر صدارت لاہور ڈویلپمنٹ اتھارٹی کی گورننگ باڈی کا تیسرا اجلاس ہوا۔

اجلاس میں سروسز اسپتال کی اپ گریڈیشن سے متعلق امور کا جائزہ لیا گیا اور ایڈمن بلاک کی جگہ میڈیکل ٹاور بنانے کی تجویز پرغورکیا گیا۔

محسن نقوی نے آئندہ 10 سے 20 برس کی ضروریات کو مدنظر رکھ کر سروسز اسپتال کی ماسٹر پلاننگ کرنے کی ہدایت کردی۔

نگراں وزیراعلیٰ پنجاب کو بریفنگ دی گئی کہ سروسز اسپتال میں 1460بیڈز، 1390 ڈاکٹرز اور 751 نرسز ہیں۔ سروسز اسپتال کے سیوریج سسٹم اورالیکٹریفکیشن کا نظام ازسرنو لگایاجائے گا اور 42 واش رومز کو بھی دوبارہ تعمیر کیا جائے گا۔

ایل ڈی اے کی گورننگ باڈی کے تیسرے اجلاس میں ارفع کریم ٹاور سے ملحقہ پرانی سبزی اور فروٹ منڈی کی اراضی کے بہتر استعمال کی منظوری دے دی گئی۔