صوبائی وزیر اطلاعات اور رہنما پیپلز پارٹی شرجیل انعام میمن کا کہنا ہے کہ ملازمہ تشدد کیس میں ملک کا امیج خراب ہورہا ہے۔

کراچی میں میڈیا سے گفتگو کرتے ہوئے شرجیل میمن نے کہا کہ میڈیا اہم ادارہ نہیں لیکن پھر بھی اس کا کردار ہے، کچھ بیرون ممالک کے صحافیوں نے رضوانہ پر تشدد کا سوال اٹھایا، اس کیس میں ملک کا امیج خراب ہو رہا ہے۔

انہوں نے کہا کہ چائلڈ لیبر پر قانونی طور پر پابندی ہے تاہم منصف کے گھر میں قانون کی دھجیاں اڑائی گئیں اور 14 سالہ بچی پر بہیمانہ تشدد کیا گیا۔

صوبائی وزیر کا کہنا تھا کہ معصوم بچی پر کیسے کوئی اتنا تشدد کر سکتا ہے، چھوٹی چھوٹی چیزوں پر ازخود نوٹسز لیےجاتے رہے ہیں مگر اس بچی پر تشدد کا ازخود نوٹس نہیں لیا جا رہا۔

شرجیل میمن نے کہا کہ اعلیٰ عدالتیں اس معصوم بچی کو انصاف دیں، جج صاحب کی بیگم کیوں قانون سے بالاتر ہے۔