اسمبلیوں کی مدت پوری ہونے سے قبل وفاق سمیت سندھ اور بلوچستان میں نگراں حکومت کے لئے حوالے سے حکومتی اور اپوزیشن جماعتوں کے مذاکرات ہوئے۔

سندھ میں نگراں حکومت کے قیام کے حوالے سے مشاورت کے لئے ایم کیو ایم پاکستان کا وفد اپوزیشن لیڈر سندھ اسمبلی رعنا انصار کی قیادت میں فنکشنل ہاؤس پہنچا۔

ایم کیوایم کے وفد میں سنجے پاروانی،عباس جعفری، جاوید حنیف، علی خورشیدی اور دیگر شامل ہیں، جب کہ گرینڈ ڈیموکریٹک الائنس (جی ڈی اے) کے وفد میں ڈاکٹر صفدرعباسی، سردار عبدالرحیم ، حسنین مرزا، عرفان اللہ مروت اور دیگر شریک تھے۔

دونوں جماعتوں کے رہنماؤں کے درمیان ہونے والے مذاکرات میں سندھ میں نگراں حکومت کے قیام سےمتعلق لائحہ عمل پرغور کیا گیا۔

نگران سیٹ اپ کے لئے ابھی تک مشاورت نہیں ہوئی

سندھ اسمبلی کے باہر میڈیا سے بات کرتے ہوئے صوبائی وزیر ناصر شاہ کا کہنا تھا کہ نگران سیٹ اپ کے لئے ابھی تک مشاورت نہیں ہوئی، میڈیا اور سوشل میڈیا پر چلنے والی خبریں قیاس آرائیاں ہیں، وزیراعلیٰ کے پاس اسمبلیاں تحلیل کے بعد وقت ہوتا ہے۔

ناصر حسین شاہ نے کہا کہ نئی مردم شماری کے مطابق انتخابات سے متعلق شہباز شریف کے بیان پر تحفظات ہیں، ہمارامطالبہ ہے الیکشن مقررہ وقت پر 60 دن کے اندر ہوں۔

صوبائی وزیر نے کہا کہ کراچی میں ہماری پانچ سالہ کارکردگی دیگر صوبوں سے بہتر رہی، ملیر میں کسی گوٹھ کو مسمارنہیں کریں گے۔