بھارت میں ہونے والے کرکٹ ورلڈ کپ کو دیکھنے کے لئے شائقین کے پاس فزیکل ٹکٹ ہونا لازمی ہے، آن لائن ٹکٹ کی سہولت ختم کردی گئی ہے۔

رواں برس اکتوبر میں کرکٹ ورلڈ کپ کا میلہ بھارت میں سجے گا، جس شائقین کو بے صبری سے انتظار ہے، ٹورنامنٹ کے حوالے سے ہونے والے تمام فیصلے شائقین کے لئے کبھی خوشی اور کبھی غم کا پیغام لارہے ہیں۔

کرکٹ ورلڈ کپ کے چاہنے والے والوں کے لئے بری خبر یہ ہے کہ بھارت نے آن لائن صارفین کو ٹکٹوں کی خریداری سے محروم کر دیا ہے، اور اس حوالے سے سیکرٹری بھارتی کرکٹ بورڈ جے شاہ نے بیان بھی جاری کردیا ہے۔

آئی سی سی کرکٹ ورلڈکپ کے ٹکٹوں کی خریداری کے حوالے سے جے شاہ نے بتایا کہ بھارت میں ہونے والے ورلڈ کپ کے لیے ای ٹکٹ کا اجرا نہیں ہوگا، اور تماشائیوں کے لیے ای ٹکٹ کی سہولت دستیاب نہیں ہوگی۔

سیکرٹری بھارتی کرکٹ بورڈ کا کہنا تھا کہ کرکٹ فینز کو فزیکل ٹکٹس اپنے ہمراہ رکھنا ہوں گے، 7 سے 8 سینٹرز پر فزیکل ٹکٹس ایڈوانس میں دستیاب ہوں گی۔

جے شاہ نے وضاحت پیش کی کہ احمد آباد اور لکھنؤ جیسے بڑی گنجائش والے اسٹیڈیمز کے لیے میگا ایونٹس کے دوران ای ٹکٹس ممکن نہیں، آئی سی سی کے ساتھ ملکر ورلڈکپ ٹکٹس کے حوالے سے جلد اعلان کریں گے۔