بجلی کی بندش کے باعث ناسا مشن کنٹرول اور بین الاقوامی خلائی اسٹیشن کے درمیان مختصر وقت کیلئے رابطہ مقطع ہونے سے کھلبلی مچ گئی۔

ہیوسٹن کے جانسن اسپیس سینٹر کی عمارت میں اپ گریڈیشن کا کام جاری تھا کہ بجلی بند ہوگئی، جس کے بعد مشن کنٹرول اسپیش اسٹیشن کو کمانڈ نہیں بھیج سکا اور مدار میں موجود سات خلابازوں سے بات ختم ہوگیا۔

خلائی اسٹیشن کے پروگرام مینیجر جوئل مونٹیلبانو نے کہا کہ رابطہ بند ہونے سے خلانوردوں اور اسٹیشن کو کوئی خطرہ نہیں تھا، جبکہ بیک اپ کنٹرول سسٹم نے 90 منٹ کے اندر اندر معاملہ سنبھال لیا۔

عملے کو بجلی بند ہونے کے بعد 20 منٹ کے اندر روسی کمیونیکیشن سسٹم کے ذریعے مسئلہ کے بارے میں آگاہ کیا گیا۔

مونٹیلبانو کا کہنا ہے کہ یہ پہلا موقع ہے جب ناسا کو ان بیک اپ سسٹمز کو استعمال کرنا پڑا ہے۔

ناسا نے سمندری طوفان یا دیگر آفات کی صورت میں ہیوسٹن سے میلوں کے فاصلے پر واقع ایک بیک اپ کنٹرول سینٹر بنایا ہے۔