شہباز شریف نے نگران سیٹ اپ اور عام انتخابات پر اتحادیوں سے مشاورت کے لئے ن لیگ کی 5 رکنی کمیٹی تشکیل دے دی۔

آئندہ ماہ اسمبلیاں تحلیل ہوجائیں گی اور نگران سیٹ اپ ملک کی باگ ڈور سنبھالے گا، تاہم نگراں سیٹ اپ سے قبل وزیراعظم کو تمام اتحادیوں اور اپوزیشن سے مشاورت کرنا ہوگی۔

وزیراعظم شہباز شریف نے نگران سیٹ اپ اور عام انتخابات کے حوالے سے اتحادیوں سے مشاورت کے لئے ن لیگ کے سینئیر ترین رہنماؤں پر مشتمل 5 رکنی کمیٹی تشکیل دے دی ہے۔

ن لیگ کی مشاورتی کمیٹی میں سردار ایاز صادق، خواجہ سعد رفیق، خواجہ آصف، احسن اقبال اور اسحاق ڈار شامل ہیں، جو براہ راست اپنے قائد نواز شریف سے رابطے میں رہیں گے۔

کمیٹی پیپلزپارٹی، جے یو آئی، ایم کیو ایم اور دیگر اتحادیوں سے مذاکرات کرے گی، ااور ان مذاکرات میں اسمبلیوں کی تحلیل کی تاریخ، نگران سیٹ اپ میں کون کون ہوگا، اور عام انتخابات کے انعقاد کی تاریخ کے امور پر بات چیت کی جائے گی۔

ذرائع کا کہنا ہے کہ وزیراعظم نے اتحادی جماعتوں کو بھی مذاکراتی کمیٹیاں تشکیل دینے کی ہدایت کردی ہے۔