چیئرمین تحریک انصاف عمران خان کے غیر شرعی نکاح کا معاملہ عدالت میں ہے،اسلام آباد ڈسٹرکٹ اینڈ سیشن کورٹ کیس کے قابلِ سماعت ہونے سے متعلق فیصلہ کچھ دیر میں سنائے گی۔

اسلام آباد ڈسٹرکٹ اینڈ سیشن کورٹ کے جج قدرت اللہ نے درخواست پر سماعت کی۔

چیئرمین پی ٹی آئی کے غیرشرعی نکاح کیس میں درخواست گزار وکیل رضوان عباسی نے درخواست پردلائل دیے۔

دلائل سننے کے بعد اسلام آباد ڈسٹرکٹ اینڈ سیشن کورٹ نے چیئرمین پی ٹی آئی کیخلاف غیرشرعی نکاح کیس پر فیصلہ محفوظ کرلیا۔

نکاح کیس قابلِ سماعت ہوگا یا نہیں اس حوالے سے فیصلہ کچھ دیر بعد سنایا جائے گا۔

یاد رہے کہ عمران خان کیخلاف دوران عدت نکاح کا مقدمہ چند روز پہلے دوبارہ کھل گیا، 13 جولائی کو ڈسٹرکٹ اینڈ سیشن کورٹس اسلام آباد کے سیشن جج اعظم خان نے چئیرمین پی ٹی آئی کے خلاف غیر شرعی نکاح کیس پر دائر اپیل منظور کرلی تھی۔

فاضل عدالت نے غیر شرعی نکاح کیس قابل سماعت قرار دیتے ہوئے سول جج نصر مِن اللہ کے فیصلے کو کالعدم قرار دے دیا۔ اور فیصلہ ریمانڈ بیک کرکے سول کورٹ کو دوبارہ سننے کی ہدایت کی۔

واضح رہے کہ سول جج نصرمِن اللہ نے چیرمین پی ٹی آئی کے خلاف غیر شرعی نکاح کیس ناقابلِ سماعت قرار دیا تھا، عدالت نے ریمارکس دیے کہ دوران عدت نکاح کا معاملہ عدالت کے دائرہ اختیار سے باہر ہے۔