ٹوئٹر کے مالک ایلون مسک نے انکشاف کیا ہے کہ اشتہارات کی آمدنی میں 50 فیصد کمی اور بھاری قرضوں کے بوجھ کی وجہ سے پلیٹ فارم خسارے کا شکار ہے۔

ایلون نے ہفتے کو ایک فالوور کے مانگے گئے کاروباری مشورے کے جواب میں لکھا، ’اس سے پہلے کہ ہم کوئی اور آسائش حاصل کریں، ہمیں مثبت کیش فلو تک پہنچنے کی ضرورت ہوگی۔‘

اشتہار کی آمدنی ایک متنازع مسئلہ اور سائٹ کے لیے ایک مشکل جنگ رہی ہے، کیونکہ مسک کے اقتدار سنبھالنے کے بعد مشتہرین نے اشتہار دینا بند کردیے تھے۔

مشتہرین مواد میں اعتدال، بڑے پیمانے پر چھانٹیوں اور ٹوئٹر کے مستقبل کے بارے میں عام غیر یقینی صورتحال کے بارے میں فکر مند تھے۔

لنڈا یاکارینو، ایک سابق NBCU یونیورسل مارکیٹنگ ایگزیکٹو ہیں، جنہوں نے حال ہی میں مسک سے چیف ایگزیکیوٹو کا عہدہ سنبھالا ہے، وہ ممکنہ طور پر اپنے اشتہاری تجربے سے مشتہرین کو واپس لانے کی جدوجہد کر رہی ہیں۔

نیویارک ٹائمز نے ایک اندرونی پیشکش کا حوالہ دیتے ہوئے رپورٹ کیا کہ ٹوئٹر کی امریکی اشتہاری آمدنی یکم اپریل سے مئی کے پہلے ہفتے تک پانچ ہفتوں کے دوران سالانہ 59 فیصد کم رہ ہے۔

گزشتہ ماہ مارکیٹ انٹیلی جنس فرم سینسر ٹاور کی جانب سے سی این این کو فراہم کردہ اعداد و شمار کے مطابق، ستمبر تک ٹوئٹر کے ٹاپ 1,000 مشتہرین میں سے صرف 43 فیصد مسک کے قبضے سے ایک ماہ قبل اپریل تک پلیٹ فارم پر اشتہار دے رہے تھے۔

مسک نے گزشتہ ماہ رابرٹ ایف کینیڈی جونیئر کے ساتھ ٹوئٹر اسپیسز لائیو اسٹریم ایونٹ میں کہا، ’بنیادی طور پر، ہماری آمدنی آدھی رہ گئی ہے کیونکہ ہم نے لائن کو پورا نہیں کیا۔‘

اور اب حریف ایپ ”تھریڈز“ کے لانچ ہونے کے ایک ہفتے سے بھی کم وقت میں 100 ملین ڈاؤن لوڈز کو عبور کرنے کے بعد ٹوئٹر پر دباؤ بڑھ رہا ہے۔

مسک نے ٹوئٹر بلیو کی رکنیت کے ساتھ نیلے رنگ کے چیک مارکس دینے سے لے کر Tweetdeck کو پے وال کے پیچھے رکھنے تک لاگت میں کمی یا نقد رقم کی تلاش کے متعدد اقدامات کیے ہیں۔

جمعرات کو، ٹوئٹر نے اعلان کیا کہ کانٹینٹ کرئیٹرز سائٹ کی اشتہاری آمدنی کا ایک حصہ حاصل کر سکیں گے، جو بظاہر مزید تخلیق کاروں کو سائٹ میں شامل ہونے کی ترغیب دینے کے لیے اٹھایا گیا اقدام ہے۔